CNN-ის ინფორმაციით, აშშ-ის დაზვერვის მიერ მოპოვებული ახალი მონაცემები მიუთითებს, რომ ირანი დონალდ ტრამპის ადმინისტრაციის მაღალჩინოსნების წინააღმდეგ ვაშინგტონში ე.წ. „ბინძური ბომბის“ ან ქიმიური იარაღის გამოყენების შესაძლო სცენარებს განიხილავს. ამის შესახებ ტელეკომპანია ამერიკელ მაღალჩინოსნებზე დაყრდნობით იუწყება.
ამ ეტაპზე საუბარი არ არის გარდაუვალ თავდასხმაზე. დაზვერვის შეფასებით, თეირანი სამომავლო მოქმედების შესაძლო ვარიანტებს ამუშავებს. მიუხედავად ამისა, მოპოვებული ინფორმაცია კონკრეტულ სამიზნეებსა და ლოკაციებს მოიცავს, რის გამოც ვაშინგტონში უსაფრთხოების ზომები გააძლიერეს და საგანგებო რეაგირების გეგმები აამოქმედეს.
ამერიკელი ოფიციალური პირები ირანის შესაძლო გეგმებს ესკალაციის საგანგაშო ნიშნად მიიჩნევენ. მათი შეფასებით, თეირანის გააქტიურება შესაძლოა უკავშირდებოდეს აშშ-ის სამხედრო დარტყმებითა და მკაცრი ეკონომიკური ბლოკადით გამოწვეულ ზეწოლას.CNN-ის წყაროების ცნობით, გასული ერთი კვირის განმავლობაში უსაფრთხოების საკითხებზე არაერთი შეხვედრა გაიმართა. ირანიდან მომდინარე შესაძლო საფრთხეების გამო, გასულ კვირას აშშ-ის ფინანსთა მინისტრი სკოტ ბესენტი საიდუმლო სამსახურის გადაწყვეტილებით სამხედრო ბაზის ტერიტორიაზე მდებარე საცხოვრებელში გადაიყვანეს.
დონალდ ტრამპმა განაცხადა, რომ ადმინისტრაცია საფრთხეს მაქსიმალური სერიოზულობით ეკიდება. მისი თქმით, ირანის მხრიდან ვაშინგტონზე თავდასხმას უკიდურესად მკაცრი პასუხი მოჰყვება და თეირანი „ისეთ ფასს გადაიხდის, როგორიც აქამდე არცერთ ქვეყანას არ გადაუხდია“.
თავის მხრივ, შიდა უსაფრთხოების მდივანმა მარკვეინ მალინმა ირანის გეგმებს „ამბიციური სურვილები“ უწოდა და განაცხადა, რომ ეს ახალი საფრთხე არ არის.
დაზვერვის შეფასებით, აშშ განსაკუთრებით მოწყვლადია არატრადიციული იარაღის შესაძლო გამოყენების მიმართ. ე.წ. „ბინძური ბომბი“ ჩვეულებრივ ასაფეთქებელ ნივთიერებასა და რადიოაქტიურ მასალას აერთიანებს. მისი დამზადება ბირთვული იარაღის შექმნასთან შედარებით გაცილებით მარტივია, ხოლო თავდასხმის ორგანიზებისთვის შესაძლოა აშშ-ის ტერიტორიაზე უკვე მყოფი პირების გამოყენებაც იყოს შესაძლებელი.
ამერიკული დაზვერვის მიერ დაფიქსირებული კომუნიკაციების თანახმად, ირანული მხარე ამტკიცებს, რომ ბომბის დასამზადებლად საჭირო მასალები აშშ-ის ტერიტორიაზე უკვე დამალული აქვს. თუმცა, სპეცსამსახურებში ამ ინფორმაციის სანდოობის შესახებ ერთიანი პოზიცია არ არსებობს.
ამასთან, ამერიკული დაზვერვა აკვირდება ცნობებს ახლო აღმოსავლეთში განთავსებული აშშ-ის სამხედრო მოსამსახურეებისა და დიპლომატების წინააღმდეგ ქიმიური იარაღის შესაძლო გამოყენების შესახებაც.
თეირანი ვაშინგტონის ბრალდებებს უარყოფს. გაეროში ირანის მისიის წარმომადგენლის განცხადებით, ირანი ნებისმიერ ვითარებაში უკანონოდ მიიჩნევს ქიმიური იარაღის გამოყენებას, ხოლო გავრცელებულ ცნობებს „ყალბსა და შეთითხნილს“ უწოდებს. ამასთან, მას უშუალოდ „ბინძური ბომბის“ შესახებ ბრალდებაზე კონკრეტული კომენტარი არ გაუკეთებია.
ირანის საგარეო საქმეთა სამინისტროს სპიკერმა ესმაილ ბაღაიმ კი განაცხადა, რომ ომის დამწყებები შემდგომი აგრესიისა და სისასტიკის გასამართლებლად წინასწარ ქმნიან შესაბამის საბაბებს.


