ქართველი მასწავლებელი, ვლადიმერ აფხაზავა მსოფლიო საუკეთესო მასწავლებლის პრიზის 10 ფინალისტს შორის დასახელდა. The Global Teacher Prize 2019 ყოველ ფინალისტს პატარა სიუჟეტს უძღვნის, რომელიც მის გვერდზეა გამოქვეყნებული. მათ შორის არის ჩიბათის საშუალო სკოლის მასწავლებლის, ვლადიმერ აფხაზავასადმი მიძღვნილი სიუჟეტი. ეს პრიზი Varkey–ს ფონდის ინიციატივაა, რომელიც გამარჯვებულ მასწავლებლებელს 1 მილიონ დოლარს ჯილდოდ გადასცემს, როგორც განსაკუთრებულ მასწავლებელს, რომელმაც საკუთარ პროფესიას ბევრი რამ შესწირა.
ვლადიმერ აფხაზავა ლანჩხუთის რაიონის სოფელ ნიგვზიანი დაიბადა. 2010 წლიდან მუშაობდა ლანჩხუთის მუნიციპალიტეტის სოფელ ჩიბათის საჯარო სკოლაში სამოქალაქო განათლების მასწავლებლად. 2012 წლიდან არის მცირე საოჯახო სახლის მენეჯერი სადაც რვა ბავშვი ცხოვრობს. მისი მიზანია მოსწავლეები აქტიურ მოქალაქეებად და თანამედროვე საზოგადოების ლიდერებად აღზარდოს, რათა ისინიდამოუკიდებელ, კრიტიკულად მოაზროვნე პიროვნებებად ჩამოყალიბდნენ, შეძლონ საკუთარი აზრის გამოხატვა, იდეების გენერირება და საკუთარი ინიციატივების განხორციელება. 2003 წელს მან დააფუძნა ბანაკი, სადაც მოსწავლეები არაფორმალურ განათლებას იღებდნენ. ბავშვებმა ბანაკს “ლადოს ბანაკი” უწოდეს. მისი ბევრი აქტივობა თუ ინიციატივა მთლიანად სასკოლო საზოგადოებას მოიცავს. ამ მიზნით, სკოლის მასშტაბით მან წამოიწყო პროექტი “დემოკრატიული რევოლუცია”, რომლის მიზანია მოსწავლეთა გააქტიურება, მათი იდეებისა და ინიციატივების რეალიზება. მის მიერ ინიცირებულმა არაერთმა პროექტმა ფართო აღიარება მოიპოვა. მაგალითისთვის, პროექტს “ეთნო რძლები” საერთაშორისო ჯილდოც გადაეცა. პროექტი მულტიკულტურალიზმის და ტოლერანტობის განვითარებას ისახავდა მიზნად. მის საქმიანობას მუდმივად გამოარჩევს დევიზი “ბავშვი უპირველეს ყოვლისა”. სწორედ ამ ხედვას ეფუძნება მისი, როგორც პედაგოგიური მიდგომა, ასევე სამოქალაქო აქტივიზმი. 2017 წლის 5 ოქტომბერს გადაეცა მასწავლებლის ეროვნული ჯილდო .
