აშშ-ის ელჩის მოვალეობის შემსრულებელი ელიზაბეთ რუდი ლუქსემბურგში რუსი დეპუტატების მიერ გაკეთებულ მწვავე განცხადებებს ეხმაურება.
ეუთოს საპარლამენტო ასამბლეაში მყოფი რუსული დელეგაციის წარმომადგენლები აგრესიული განცხადებებით გამოირჩეოდნენ და აცხადებდნენ, რომ საქართველოს შემადგენლობაში ოკუპირებული აფხაზეთი და ცხინვალი არასდროს დაბრუნდება.
აღნიშნულ განცხადებების პასუხად ელიზაბეთ რუდმა კიდევ ერთხელ ღიად დააფიქსირა, რომ აშშ მხარს უჭერს საქართველოს ტერიტორიულ მთლიანობას. მისივე თქმით, აფხაზეთი და ცხინვალი საქართველოს განუყოფელი ნაწილებია.
აშშ-ის ელჩის მოვალეობის შემსრულებელმა რუსეთს მოუწოდა, რომ გაიწვიოს საქართველოს ოკუპირებული ტერიტორიების ე.წ. დამოუკიდებლობის აღიარება.
“ზოგიერთმა დეპუტატმა შეიძლება ასე თქვას, მაგრამ ეს სიმართლე არ არის. აფხაზეთის და სამხრეთ ოსეთის რეგიონები საქართველოს განუყოფელი ნაწილია. აშშ მტკიცედ უჭერს მხარს საქართველოს ტერიტორიულ მთლიანობას და აშშ მოიწოდებს რუსეთს, შეასრულოს ცეცხლის შეწყვეტის ხელშეკრულება და უკან წაიღოს ამ რეგიონების ე. წ. აღიარება,” – განცხადა ელიზაბეთ რუდმა.
ელიზაბეთ რუდი ასევე გამოეხმაურა პარლამენტი წინ მიმდინარე აქციებს და განაცხადა, რომ მიმდინარე მოვლენებს აშშ თვალს ადევნებს. რუდის თქმით, აქციებზე მშვიდობიანი შეკრების და გამოხატვის თავისუფლება ყველას აქვს.
