სამოქალაქო აქტივისტი და ადვოკატი ბექა ბასიალაია, რომელიც 18 ნოემბერს აქციაზე დააკავეს, ციხიდან წერილს ავრცელებს. როგორც წერილიდან ხდება ცნობილი ის გასაჩივრების უფლებით არ ისარგებლებს და ამ გადაწყვეტილების სამ ძირითად მიზეზზე საუბრობს.
“სალამი გორიდან, გორის იზოლატორის მე-3 საკნიდან, სადაც იმდენად კარგია, რომ 13 დღე პატიმრობისთვის მეცოტავება კიდეც. მადლობა მოსამართლედ წოდებულ ვალერიანე ფილიშვილს დაუგეგმავი შვებულებისთვის. სერიოზულად კი გასაჩივრების უფლებით არ ვისარგებლებ შემდეგ გარემოებათა გამო:
1) მურუსიძე-ჩინჩალაძის სასამართლოს მოწყალებას არ ვთხოვ. ყველამ ვიცით, რომ ჩვენ ვართ პოლიტიკური პატიმრები და ჩვენთან დაკავშირებული გადაწყვეტილებები მიიღება არა სასამართლო დარბაზებში, არამედ ივანიშვილის კარნახით, რასაც უსიტყვოდ ემორჩილებიან ფილიშვილები, მურუსიძეები, იაშვილები, ჩახნაშვილები, ხორავები, კლანია სახელი მათი.
2) ბიძინა ივანიშვილი საბოლოოდ დაადგა პუტინიზაციის გზას, მისი ღიად პრორუსული რეჟიმისგან შეფარდებული 13-დღიანი პატიმრობა რა მოსატანია იმ გმირი ქართველების ტყვეობასთან, ვინც საოკუპაციო რეჟიმების ციხეებში იმყოფებიან. ყოველგვარი პათეტიკის გარეშე, სოლიდარობა ვაჟა გაფრინდაშვილს და მის ბედში მყოფ ჩვენს თანამოქალაქეებს, მეუხერხულება კიდეც, მათ გვერდით რომ ვახსენებ თავს გორში, მხოლოდ 13 დღით, ოჯახის, მეგობრების, თანამებრძოლების, კოლეგების ყურადღებისა და მზრუნველობის ქვეშ მყოფი პატიმარი.
3) ბრძოლა, რაც დაწყებულია, არ შეჩერდება, გრძელდება, აზვირთდება და წალეკავს ბიძინა ივანიშვილის მტერთან მოკეკლუცე, მეგობრების გადამგდებ, საკუთარი მოქალაქეების გამცურებელ რეჟიმს. რეჟიმს, რომელიც ძალოვანთა ძალასღა ეყრდნობა მხოლოდ და ისინიც მოიღლებიან, არა უძლურებისგან, არამედ უსამართლო ბრძანებათა შესრულებისგან და აი მაშინ, ბიძინა დარჩება მარტო და შეიმუსრება, როგორც ასტაპორელი ვაჭარი კრაზნუს მო ნაკლოზი.
მან მთავარ პროკურატურასაც მიმართა და მოუწოდა, რომ მისი პატიმრობის ვადასთან დაკავშირებით ცვლილება არ შეიტანოს.
“პ.ს. აღმოჩნდა, რომ ამ ტექსტამდე, ჩემს მეგობარსა და კოლეგას ივანე პეტრიაშვილს ჩემთან შეუთანხმებლად, ცხადია კეთილი მიზნებით, შეუტანია სააპელაციო საჩივარი, რაც უახლოეს დროში იქნება ანულირებული. საქართველოს მთავარ პროკურატურას მოვუწოდებ ჩემი პატიმრობის ვადასთან დაკავშირებით ნუ შეიტანთ პროტესტს, როგორც ეს წინა შემთხვევაში გააკეთეთ, საზოგადოების ზეწოლის შედეგად. არავის სჭირდება თქვენი ყალბი ჰუმანიზმი” – აღნიშნულია წერილში.”
შეგახსენებთ, 18 ნოემბერს პიკეტირებული პარლამენტის შენობის გათავისუფლების მიზნით მომიტინგეები წყლის ჭავლის გამოყენებით სპეცრაზმმა დაშალა. სწორედ, ამ დროს დააკავეს 37 ადამიანი. მათ შორისაა ბექა ბასიალაიაც.
მოსამართლემ მხოლოდ ნაწილის განაჩენი გამოაცხადა, დანარჩენი 25 დაკავებულის პროცესები კი ეტაპობრივად გაიმართება. ბექა ბასილაია პატიმრობა 13 დღით შეეფარდა.
