აქციის დაშლისას დაშავებულებზე კომპენსაცია აუცილებლად გაიცემა-ამის შესახებ განცხადება კახა კალაძემ გააკეთა.
„რამდენიმე დღის წინ გავრცელდა სოციალურ ქსელში თითქოს მე დავაფინანსე მაკო გომურის გამგზავრება უცხოეთში და მკურნალობა. არ არის ეს სწორი ინფორმაცია. ვეხმარებით ვიღაცებს, სიკეთეს ვაკეთებთ, მაგრამ რაც არ გამიკეთებია, მივითვისო, მგონი, არასწორი იქნება ჩემი მხრიდან. მოვისმინე ფონდი „ქართუს“ განცხადება, რომელიც თავის თავზე იღებს დაზარალებულების გამოჯანმრთელების ყველა ხარჯს. რაც შეეხება საკომპენსაციო თანხებს, ამასთან დაკავშირებით გუნდში მიმდინარეობს მუშაობა და კომპენსაცია აუცილებლად გაიცემა, როგორც განვითარებულ ქვეყნებში და ქალაქებშია. მაღალი კრიტერიუმები იქნება აღებული“, – განაცხადა კალაძემ.
შეგახსენებთ, 20 ივნისის აქციის დაშლის შედეგად 240 ადამიანი დაშავდა, მათ შორის 80 სამართალდამცავი და 33 ჟურნალისტი. რამდენიმე მათგანი მკურნალობას კვლავ საავადმყოფოში განაგრძობს, ხოლო ის პირები, რომლებმაც აქციაზე თვალი დაკარგეს მკურნალობას საზღვარგარეთ აგრძელებენ.
