“არა ქსენოფობიას”, “არა სიძულვილს”- ვიტალი საფაროვის მკვლელობის საქმის განხილვის დაწყებამდე საქალაქო სასამართლოსთან მდუმარე აქცია მიმდინარეობს. თბილისის საქალაქო სასამართლოსთან საფაროვის ოჯახის წევრები და მეგობრები შეიკრიბნენ. აქცია “ადამიანის უფლებათა სახლის” მიერ არის ორგანიზებული. აქციის მონაწილეები მკვლელის სათანადოდ დასჯასა და ნეონაცისტური ორგანიზაციების საქმიანობის შესწავლას მოითხოვენ.აქციის მონაწილეებს მიაჩნიათ, რომ სიძულვილით მოტივირებული დანაშაული საკანონმდებლო დონზე უნდა განისაზღვროს.
ვიტალი საფაროვი, 25 წლის უფლებადამცველი 2018 წლის 30 სექტემბერს თბილისის ცენტრში, ბარ „ვარშავას“ (პუშკინის ქუჩა) მიმდებარე ტერიტორიაზე რამდენიმე შეიარაღებულმა პირმა მოკლა, რომლებიც როგორც მოგვიანებით გაირკვა, ერთ-ერთი ქართული ნეონაცისტური დაჯგუფების წევრები არიან. ჩართულობისა და განვითარების ცენტრის განცხადებით, შეშფოთებას იწვევს ის ფაქტი, რომ უფლებადამცველი სწორედ იმ დაჯგუფების წარმომადგენლების მსხვერპლი გახდა, რომლებიც საზოგადოებაში აღვივებენ რასიზმს და ქსენოფობიას.
უფლებადამცველის მკვლელობის საქმეზე ამ დროისთვის დაკავებულია საქართველოს ორი მოქალაქე. ვიტალი საფაროვის ოჯახის ადვოკატის თქმით, მოწმეთა ჩვენებები და ბრალდებულების პროფილები სოციალურ ქსელებში ბადებს საფუძვლიან ეჭვს, რომ ისინი ულტრანაციონალისტური, ნეონაცისტური დაჯგუფების წევრები არიან. ამ უკანასკნელს, არ უარყოფენ თავად დაკავებულებიც. ერთ-ერთ დაკავებულს ბრალი წარდგენილი აქვს, სსსკ-ის 376-ე მუხლით, რაც დანაშაულის შეუტყობინებლობას გულისხმობს. თუმცა, არსებობს მტკიცებულებები, რომ ბრალდებული უშუალოდ მონაწილეობდა მკვლელობაში, იგი ცემდა მსხვერპლს და ურტყამდა ,,კასტეტს“, რითაც გამოიხატება დანაშაულში მისი აქტიური მონაწილეობა.
დაკავებულის მსგავსად მკვლელობაში ასევე მონაწილეობდა კიდევ ერთი არასრულწლოვანი პირი, რომელიც ამ ეტაპამდე არ არის დაკავებული და საქმეში მხოლოდ მოწმის სტატუსით მონაწილეობს.
ახალგაზრდა უფლებადამცველი არასამთავრობო ორგანიზაცია „ჩართულობის და განვითარების ცენტრში“ მუშაობდა. იგი მრავალი წლის განმავლობაში აქტიურად იყო ჩართული მოზარდების ტოლერანტული ბანაკების ორგანიზებაში, მონაწილეობდა რასიზმის, ქსენოფობიისა და დისკრიმინაციის წინააღმდეგ განხორციელებულ არაერთ პროექტში და იყო ებრაული თემის აქტივისტი.
