გორის სამხედრო ჰოსპიტალში 31 წლის მამაკაცი გარდაიცვალა. რა გახდა ლევან ჯიოშვილის სიკვიდილის მიზეზი – ამას ექსპერტიზა დაადგენს. ოჯახის წევრებს პრეტენზიები სამედიცინო პერსონალთან აქვთ და მათ უყურადღებობაზე საუბრობენ. მათი თქმით, გარდაცვალებამდე ერთი საათით ადრე პაციენტი საავადმყოფოდან მაღაზიაში იყო გასული. სამხედრო ჰოსპიტალში კი განმარტავენ, რომ პაციენტი მძიმე დიაგნოზით ინტენსიურ პალატაში მკურნალობდა, თუმცა რა გახდა მისი უეცარი გარდაცვალების მიზეზი, ამის ვერ ამბობენ.
“ფეხი სტკიოდა, ეტყობა იბანავა, ეგ იყო მაგის ავადმყოფობა. არაფერი მაგას არ სტკიებია, შემოვიდა და მკვდარი გაგვატანეს აქედან. ექიმი არ გამოვიდა, ექიმი! არაფერი ცნობა არ მისცეს რა დიაგნოზი იყო. მკვდარი გაგვატანეს ობლობაში გაზრდილი ბავშვი,”-აცხადებს გარდაცვლილის ახლობელი.
31 წლის მამაკაცის ოჯახის წევრები მედპერსონალისგან გარდაცვალების ზუსტი მიზეზის გამოაშკარავებას ითხოვენ და მათ უყურადღებობაში ადანაშაულებენ.
“ოთხის ნახევარი იყო ველაპარაკე მშვენივრად იყო, მოვედი, ხუთი იყო და დაღუპული იყო. იყო უყურადღებობა, სხვა არაფერი,”-აცხადებს, გარდაცვლილის და, თამარ ჯაოშვილი.
თავად კლინიკის წარმომადგენლები კი ამბობენ, რომ მათ ყველა საჭირო პროცედურა ჩაატარეს პაციენტის გადასარჩენად.
“პაციენტმა ინტენსიური ბლოკის პალატაში უეცრად დაკარგა გონება, იმავე წუთს გამოწვეული იქნა რეანიმაციული ბრიგადა, ჩატარებული რეანიმაციული ღონისძიებები აღმოჩნდა უშედეგო,”-აცხადებს ინფექციური განყოფილების ხელმძღვანელი, ნელი ჯავახიშვილი.
