“ქართული ოცნების” თავმჯდომარე ბიძინა ივანიშვილი ბლუმბერგის სიაში დაწინაურდა- რეიტინგის მიხედვით ის 352-ე ადგილს იკავებს.
ბლუმბერგის მილიარდელების ინდექსის 2019 წლის 13 ივნისის მონაცემებით, ივანიშვილი 270 მილიონი დოლარით გამდიდრდა და მისი ქონება 5.27 მილიარდ აშშ დოლარს შეადგენს.
პირველ იანვარს, ქართველი მილიარდელის ქონება 5 მილიარდ დოლარს შეადგენდა.
აღსანიშნავია, რომ Forbes-ის ვერსიით, საქართველოს ყოფილი პრემიერის ბიძინა ივანიშვილის ქონება ჯერ კიდევ 4.9 მილიარდს დოლარს შეადგენს. ამერიკული გამოცემის მიხედვით, ბიძინა ივანიშვილის ქონება დივერსიფიცირებულია, ხოლო მისი ყველაზე მსხვილი აქტივები ფულადია.
“ბიძინა ივანიშვილმა ქონება რუსეთში დააგროვა 1990-იან წლებში რკინის მადნეულის და ფოლადის წარმოებით, ბანკებითა და უძრავი ქონებით. 2003 წელს ის საქართველოში დაბრუნდა, ხოლო 2012 წელს პრემიერად აირჩიეს”, – წერია ივანიშვილის შესახებ მოკლე აღწერაში.
