ლევან ბერძენიშვილი ახალგაზრდებს, რომლებიც უკვე მეჩვიდმეტე დღეა საპროტესტო აქციებს არ წყვეტენ, სპეციალურად ჩაწერილი ვიდეოთი მიმართავს.
“საქართველოს ისტორიაში არ ყოფილა არცერთი დღე, არცერთი წამი, როდა მისი შვილები არ იბრძოდნენ მისი თავისუფლებისთვის. ჩვენ ჩვენი მორიგეობა მოვიხადეთ როგორც მოვალეობა და თქვენ ჩაგაბარეთ ეს ქვეყანა, მაგრამ ჩვენ არსად არ მივდვართ, არ წავსულვართ, თქვენთან ერთად ვიბრძვით. როდესაც ერთად ბრძოლაში ვართ, კარგად გვესმის, რომ ახლა უპირველეს ყოვლისა თქვენი დროა. თქვენ ყოველდღე მოდიხართ აქ როგორც სამსახურში, თქვენი ქვეყნის სამსახურში. როგორც გოეთემ თქვა, თავისუფლებას და სიცოცხლეს ის იმსახურებს, ვინც იგი ყოველდღიური ბრძოლით მოიპოვა.
თქვენ ხართ თავისუფალი თაობა, დაბადებული თავისუფალ ქვეყანაში. რომელიც ბოროტებას ეუბნება არას. მონობას ეუბნება არას. ეს არ არის ივანიშვილის ქვეყანა. ეს არ არის გახარიას ქვეყანა. ეს არც სამარცხვინო პარლამენარებისა და უწიგნური მინისტრების ქვეყანაა.
ეს თქვენი ქვეყანაა, ეს ჩვენი ქვეყანაა.
ჩვენ თავისუფლებას ვერავინ ვერ დაგვითრგუნავს, ვერავითარი მეფე, ვერავითარი ბიძინა ივანიშვილი, ვერავითარი გახარია, ვერავითარი უდღეური საქართველოს მთავრობა.
საქართველოს არ ეკადრება ასეთი ხელისუფლება რომელიც საკუთარი ქვეყნის ღირსების დასაცავად გამოსულ ახალგაზრდებს არბევს, ტყვიებს უშენს და თვალებს თხრის.
ჩვენ არ ვაპატიებთ ხელისუფლებას ამ დანაშაულს. და სანამ სული გვიდგას არ დავნებდებით
თქვენ არ დანებდებით. ბოროტებას ჩვენ ერთად ვეტყვით – წადი! “
