“ელენე სამჯერ მომიკვდა”-გარდაცვლილი გოგონას დედა მოზარდების მშობლებს აფრთხილებს

ნანა ბერ­ძე­ნიშ­ვი­ლი,  რომ­ლის 13 წლის გოგონა ორი წლის წინ დაიღუპა, მშობ­ლებს სოციალურ ქსელში  მიმართავს.
13 წლის ელენე სავარაუდოდ, გახ­მა­უ­რე­ბულ ონ­ლა­ინ­თა­მაშს “ლურჯ ვე­შაპს” ემსხვერ­პლა.
გოგონას დედა მოუწოდებს მშობლებს კარგად დააკვირდნენ შვილებს და გამოვლენილი გარეგნული და ხასიათის ცვლილების შემთხვევაში ყურადღებით იყვნენ, რომ მათი შვილები “ლურჯი ვეშაპის” მსხვერპლნი არ გახდნენ.

“2 წელი ელენეს გარეშე…
პოსტი იქნება მძიმე, მაგრამ ყველა მშობლისთვის აუცილებლად წასაკითხი.
ელენე სამჯერ მომიკვდა, პირველად როცა 29 აგვისტოს დამირეკეს და მთხოვეს სახლში მივსულიყავი, რადგან რაღაც გაუგებრობას ჰქონდა ადგილი, პოლიციაა მოსული და ფანჯარა არის ღიადო, მეცამე სართულის ფანჯარა, ელენს ოთახის ფანჯარა…
დალეწილი ბავშვის სხეული შუაღამისას მოასვენეს სახლში…. ვერ ვიჯერებდი როცა სკამებს აწყობდნენ, აი ისე პანაშვიდზე რომ იციან… შუაში ცარიელი ადგილი დატოვეს, ყველაზე ცენტრალური, ადგილი ელენესთვის…
მეორედ ელენე მომიკვდა მაშინ როდესაც 30 აგვისტოს გამთენიისას (როცა ელენე უკვე სახლში იყო მოსვენებული) წამიერად გავითიშე… მზის შუქმა გამაღვიძა და პირველი აზრი, რომელიც მომივიდა იყო ის, რომ ელენეს ოთახში უნდა შევსულიყავი დილა მშვიდობისა მეთქვა და მეკოცნა (ისე როგორ ყოველთვის), წამის მეათასადში მივხვდი რომ ელენე ცოცხალი აღარ იყო… მაშინ მეორედ მომიკვდა…
მესამედ მაშინ მომიკვდა, როცა ქვაზე დახატეს, დახატეს და საამქროში დაგვიბარეს, მობრძანდით დავასრულეთო… ვუყურებდი ჩემი შვილის სურათს მარმარილოს შავ ქვაზე გამოსახულს და მივხვდი რომ ეს იყო პიკი, უკან დასახევი გზა აღარ არის…. ელენე დახატეს მარმარილოს ქვაზე, მაშინ მესამე მანიფესტი იყო მისი სიკვდილის. ვიდექი და კი არ ვტიროდი, ვხაოდი როცა მას ამ ქვაზე დახატულს ვუყურებდი… იქვე საამქროში ვიღაც ქალი იდგა და კომენტარი გააკეთა: „ვაიმე რა კარგად დახატესო, როგორც ჰგავს სურათსო“….
კიდევ ბევრი რამ იყოს ამ 2 წლის განმავლობაში, პირველი წელი ყველგან აღაჟღაჟებული შუქი მქონდა ჩართული, იმიტომ რომ ველოდი რომ მოვიდოდა, და არ მინდოდა გამომპარვოდა მისი ლანდის დანახვა…. მაგრამ არ მოვიდა, უფრო სწორეფ კი, ისე არ მოვიდა როგორც მე ველოდი, მერე შუქიც ჩავაქვრე….
რატომ გიზიარებთ ამას – ლურჯი ვერშაპი მკვლელია, და მათ ვისაც გყავს თინეიჯერები გმართებს დიდი ყურადღება, ეს არ არის გამოგონილი მითი, ეს სასტიკი მკვლელი თამაში მართლა არსებობს. თუკი თქვენი შვილი უცაბედად ხდება ინტროვერტი, უცებ გადადის დახურული ტანსაცმლის ტარებაზე, ხელიდან არ უშვებს ტელეფონს, გაუქრა ინტერესი ყველაფრის მიმართ ნუ მიაწერთ ამას მხოლოდ გარდატეხის ასაკს, შეამოწმეთ მისი ტელეფონი, მისი მიმოწერა და უთხარით რომ არაფრის არ უნდა ეშინოდეს… აუხსენით რომ თამაშის დასრულება ნებისმიერ წუთს შეიძლება, ისე რომ არც მას და არც მის საყვარელ ადამიანებს არააფერი არ დაემუქრებათ”- წერს ნანა ბერძენიშვილი.