ამერიკის შეერთებული შტატების ელჩის მოვალეობის შემსრულებელი ნიკა გვარამიას გამოკითხვაზე დაბარებას ეხმაურება. ელიზაბეთ რუდი აცხადებს, რომ ის საქმის დეტალებს არ იცნობს, თუმცა ხაზგასმით აღნიშნავს, რომ 2020 წლის საპარლამენტო არჩევნებისთვის მნიშვნელოვანია მედიაპლურალიზმი.
აშშ-ის ელჩის მოვალეობის შემსრულებელი შვეიცარიის ეროვნული დღისადმი მიძღვნილ ღონისძიებაზე იმყოფება, სადაც ჟურნალისტების შეკითხვებს უპასუხა.
ნიკა გვარამიას მაგისტრი მოსამართლის თანდასწრებით ხვალ გამოკითხავენ. “რუსთავი 2-ის” ყოფილი გენერალური დირექტორი პროკურატურაში დაიბარეს. ნიკა გვარამიამ პროკურატურაში ჩვენების მიცემაზე უარი თქვა და მაგისტრი მოსამართლის თანხლებით, სასამართლოში დაკითხვა მოითხოვა.
გვარამიას ინფორმაციით, ნინო ნიჟარაძის საჩივრის საფუძველზე, საქმე სამი მუხლით არის აღძრული – დიდი თანხის მითვისების, დიდი ოდენობით ქონების გადამალვა სამსახურეობრივი მდგომარეობის გამოყენებით, უფლებამოსილების ბოროტად გამოყენება.
