“ეს არის ფრაქციის გადაწყვეტილება, რომლის გაპროტესტებასაც არ ვაპირებ”:რას აპირებს გედევან ფოფხაძე

ფრაქცია “ქართულმა ოცნებამ“ დღეს პარლამენტის იურიდიული კომიტეტის შემადგენლობიდან გედევან ფოფხაძის გაწვევის გადაწყვეტილება მიიღო. ამის შესახებ ჟურნალისტებს გედევან ფოფხაძემ განუცხადა, რომელმაც “ქართული ოცნების“ ცენტრალურ ოფისში მიმდინარე ფრაქციის სხდომა დასრულებამდე დატოვა. მისი თქმით, ის კომიტეტში ვერანაირ თანამდებობას ვეღარ დაიკავებს. “

“ფრაქციამ მიიღო გადაწყვეტილება, გამომიწვიოს იურიდიული კომიტეტიდან. შესაბამისად, მე აღარ ვიქნები იურიდიული კომიტეტის წევრი ფრაქციის სახელით და ვერც ვერანაირ თანამდებობას ვეღარ დავიკავებ კომიტეტში. ეს არის ფრაქციის გადაწყვეტილება, რომლის გაპროტესტებასაც ნამდვილად არ ვაპირებ. საკითხი არის არა იმის თაობაზე, თუ ვინ იქნება თავმჯდომარე ან მოადგილე, არამედ ის, თუ როგორ ჩაატარებს პარლამენტი უზენაესი სასამართლოს მოსამართლეების შერჩევის პროცესს. ეს არის პრინციპული, თორემ გედი ფოფხაძე სულ რომ არ იყოს პარლამენტის წევრი, ამით პარლამენტი არ დაზარალდება”, – განაცხადა ფოფხაძემ და აღნიშნა, რომ მისი დამოკიდებულება ამ გადაწყვეტილებასთან დაკავშირებით უარყოფითია. ფოფხაძემ ასევე აღნიშნა, რომ მისთვის მიუღებელია ასეთი დამოკიდებულება რომ – მხოლოდ ერთმა მხარემ ილაპარაკოს და მეორე მხარემ ხმა არ ამოიღოს.

“მე ჩემს პოზიციას აუცილებლად დავაფიქსირებ ყველა, მათ შორის ამ კონკრეტულ საკითხთან დაკავშირებით. იმედი მაქვს, რომ ყველაფერი, რაც სათქმელია ბოლომდე ითქმება. არ მომწონს ის წესი, რომ ჩვენ ყველაფერს ვილაპარაკებთ და შენ ხმა არ ამოიღოო. ეს წესი ჩემთვის მისაღები არ არის. ის, რომ მოსამართლეების თემა ჩემთვის პრინციპული და წყალგამყოფია, ამას არ ვმალავ. აქედან გამომდინარე მგონია, რომ ჩვენ ვალდებულები ვართ, საჯარო დისკუსიებშიც მივიღოთ მონაწილეობა და საუბარი იმაზე, რომ გუნდურობა ისაა, რომ ყველა არგუმენტი მარტო გუნდის შიგნით უნდა ითქვას და გუნდის გარეთ არ უნდა ვისაუბროთ, ეს არ არის სწორი. პოლიტიკურ პროცესს ეს ხელს უშლის“, – განაცხადა ფოფხაძემ.

კითხვაზე, გუნდში განსხვავებული აზრის საჯაროდ გამოთქმა იკრძალება თუ არა, ფოფხაძე პასუხობს, რომ ასეთი აზრი ირაკლი კობახიძეს აქვს.

“ყოველთვის არ მგონია, რომ ეს ოქროს წესი იყოს. ხანდახან, ხალხმა უნდა იცოდეს განსხვავებული აზრი“, აღნიშნა ფოფხაძემ.

იყო თუ არა საუბარი ეკა ბესელიასთან დაკავშირებით, ფოფხაძე ამ შეკითხვას ასეთ პასუხს სცემს: “მიმაჩნია, რომ ეკა ბესელიაზე, თუ ის არ ესწრება სხდომას, საუბარი არ არის სწორი და ახლა დანარჩენი ვინ რაზე ილაპარაკა, თვითონ ისაუბრონ“.

ქუცნაშვილი: ბიძინა ივანიშვილმა გედევან ფოფხაძის გაწვევის საკითხზე კენჭისყრაში მონაწილეობა არ მიიღო

“ეს იყო ყველაზე რბილი გადაწყვეტილება”:მდინარაძემ იურიდიული კომიტეტიდან გედევან ფოფხაძის გაწვევის მიზეზი დაასახელა