ირაკლი ოქრუაშვილი, რომელიც საქართველოში არ იმყოფება ივანიშვილს მიმართავს და ურჩევს, მის წასვლას გაქცევას ნუ დაარქმევს. ოქრუაშვილი იმ წერილს აქვეყნებს, რომელიც შინაგან საქმეთა სამინისტროს მიწერა და რომელშიც ატყობინებს, რომ ქვეყნიდან გასვლას აპირებს და თუ მასთან შეკითხვები აქვთ და მისი საგამოძიებო მოქმედებებში მონაწილეობაა აუცილებელი, ეს ან წასვლამდე, ან ჩამოსვლის შემდეგ გააკეთონ. “გრიგოლიჩ, ძალიანაც ნუ გამოიდებ თავს, გაიქცაო. შსს-ს ბეჭედია მაგ წერილზე, ტყვიავის კოლმეურნეობის კი არა.“ – წერს ოქრუაშვილი ფეისბუქ გვერდზე.
შეგახსენებთ, რომ გამოძიებამ ირაკლი ოქრუაშვილის გამოკითხვისთვის სასამართლოს შუამდგომლობით მიმართა. შსს-ს ინფორმაციით, იმის გამო, რომ „ევროპული საქართველოს“ წევრმა გიგი უგულავამ, „ნაციონალური მოძრაობის“ წევრმა გია ბარამიძემ და პარტია „გამარჯვებული საქართველოს“ წევრმა ირაკლი ოქრუაშვილმა უარი განაცხადეს შსს-ში გამოკითხვაზე მისვლაზე, შსს მიმართავს შუამდგომლობით სასამართლოს, რათა მოხდეს ამ პირების მაგისტრატ მოსამართლის წინაშე დაკითხვა.
ირაკლი ოქრუაშვილი ამ ინფორმაციას ფეისბუქ სტატუსით პასუხობს და წერს:
“როგორც იქნა ინტუიციამ პირველად მიღალატა. 7 წლის განმავლობაში სულ მეგონა, რომ ივანიშვილს თავში ჭკუა დღეგამოშვებით ჰქონდა. შევცდი, თურმე სულ არ ჰქონია. სანამ დავბრუნდები, კარგად ჩამოყალიბდით მოწმედ უნდა გვატაროთ, ბრალს წაგვიყენებთ თუ დაელოდებით შუშის სასახლეში როდის შევარდებით.
19-ში მაქვს უკანა ბილეთი. შემიძლია უფრო ახლოს გადმოვცვალო.
28-ში ოფიციალური წერილით მოგმართეთ (შსს-ს), თუ რამე გინდათ გამაგებინეთ, თუ არა 2-ში საქმეზე მივდივარმეთქი. თუ რამე გინდოდათ მინიმუმ მომწერდით, მაქსიმუმ საზღვარზე არ გამატარებდით, მაგრამ ბიძინას ხომ გადაწყვეტილების მისაღები ერთი ადგილი არა აქვს.
აბა შენ იცი, 19-მდე გრიგოლიჩ. მანამდე არ მოიწყინო უჩემოდ. თუ მანამდე სხვების დაჭერას გადაწყვეტ, მეორე დღესვე მანდ ვარ.“
