ილიაუნის ბიზნესსკოლის სტუდენტები ილიაუნის რექტორს გადადგომისკენ მოუწოდებენ და ვადას 15 თებერვლის 22:00 საათამდე აძლევენ
ულტიმატუმი წაუყენეს განათლების მინისტრსაც. ბატიაშვილისგან ილიაუნის ბიზნესსკოლას სტუდენტები უნივერსიტეტში არსებული კრიტიკული მდგომარეობით დაინტერესებასა და კონკრეტული ნაბიჯების გადადგმას მოითხოვენ. მინისტრს საქმეში გასარკვევად იგივე ვადა აქვს, რაც რექტორს გადასადგომად. წინააღმდეგ შემთხვევაში სტუდენტები შიმშილობის დაწყებით იმუქრებიან.
სტუდენტების ულტიმატუმს ილიაუნის რექტორის მოადგილემ უპასუხა. ნინო დობორჯგინიძის თქმით, ახალგაზრდების პროტესტის ასეთი ფორმა მიუღებელია.
სტუდენტები უნივერსიტეტში განხორციელებულ რეფორმას აპროტესტებენ, რომელიც ბიზნეს სკოლის ნაცვლად ბიზნესის, განათლებისა და ტექნოლოგიების ფაკულტეტის ჩამოყალიბებას გულისხმობს. ისინი დეკანის თანამდებობაზე კვლავ გიორგი ქადაგიძის დაბრუნებას ითხოვენ.
