მალე დასასრულს უახლოვდება მამუკა ხაზარაძის და ბადრი ჯაფარიძის სასამართლო პროცესი, ასევე ნიკა გვარამიას პროცესი, რომელთა დაჭერა გადაწყვეტილია. სარწმუნო წყროს ცნობით, ხაზარაძე–ჯაფარიძის საქმე ამ კვირაში უნდა დასრულებულიყო, მაგრამ გიგი უგულავას დაპატიმრების შემდეგ დასავლელი პარტნიორების მხრიდან წამოსული უმწვავესი კრიტიკის შემდეგ ხაზარაძის დაპატიმრება მცირე ხნით გადაიდო. თუმცა ივანიშვილი არ აპირებს დასავლეთის კრიტიკის გამო პოლიტიკური ოპონენტების დაჭერაზე უარი თქვას.
ივანიშვილის გარემოცვაში ფიქრობენ, რომ თუ საკუთარი გუნდის წევრებსაც დაიჭერენ, ეს მმართველ გუნდს პარტნიორების კრიტიკაზე წონადი და დამაჯერებელი არგუმენტებით პასუხის გაცემის საშუალებას მისცემს, ანუ, მმართველი გუნდი იტყვის, რომ იჭერენ არა მხოლოდ პოლიტიკურ ოპონენტებს, არამედ მათ თანაგუნდელებსაც და ოპონენტების დაჭერას პოლიტიკური საფუძველი არ გააჩნია. ახლო მომავალში თავად მმართველი გუნდის წევრების დაჭერა თითქმის გადაწყვეტილია. ინფორმირებული წყაროს ცნობით დასაჭერთა რიგში არიან ჯანდაცვის ყოფილი მინისტრი, დავით სერგეენკო და თბილისის მერის მოადგილე ირაკლი ხმალაძე.
ეს უკანასკნელი კახა კალაძის თანაგუნდელია და 2013–2017 წლებში ენერგეტიკის მინისტრის მოადგილის პოსტზე მუშაობდა. სწორედ ამ პერიოდის კორუფციული გარიგებები გახდება სავარაუდოდ მისი დაჭერის საფუძველი.
რაც შეეხება დავით სერგეენკოს, მას სავარაუდოდ ბრალს ათეულობით მილიონი ლარის ღირებულების ცე ჰეპატიტის სამკურნალო პრეპარატების გაფუჭების საქმეზე წაუყენებენ.
განიხილება გიორგი კვირიკაშვილის და დიმიტრი ქუმსიშვილის დაპატიმრების საკითხიც. თუმცა ჯერჯერობით ამ თემაზე საბოლოო გადაწყვეტილება მიღებული არ არის.
