პოლიტტექნოლოგი მოშე კლუგჰაფტი ისრაელიდან საქართველოშია. ის საქართველოს ხელისუფლების კონსულტანტია. თბილისის ერთ–ერთ რესტორანში გადაღებული მისი ფოტო სოციალურ ქსელებში გამოჩნდა. ის სეფი შაკედთან ერთად ღვინოს სვამს.
ღია წყაროების ინფორმაციით შაკედი კონსალტინგური კომპანიის, Sefi Shaked and Partners–ის ხელმძღვანელია. ის პიარ სტრატეგიების დაგეგმვით არის დაკავებული. შაკედის მიერ განხორციელებულმა რამდენიმე კამპანიამ ისრაელში სკანდალები გამოიწვია. მაგალითად, კომედიურმა ვიდეორგოლებმა მოსადის მიერ ჰამასის დაჯგუფების ლიდერის მკვლელობის შესახებ.
რაც შეეხება კლუგჰაფტს, მისი მსხვილი პოლიტიკური კამპანია საქართველოს 2018 წლის საპრეზიდენტო არჩევნები იყო. ის ქართულ ოცნებას მეორე ტურის წინ ეხმარებოდა და ბევრი სალომე ზურაბიშვილის გამარჯვებას მის დამსახურებად თვლის. სწორედ ის იყო ავტორი აგრესიული და ზიზღზე აგებული კამპანიისა, რომელიც ხელისუფლების ოპონენტების მიმართ ხორციელდებოდა. სიძულვილის კამპანიის პარალელურად მისივე იდეა იყო დამოუკიდებელი კანდიდატის ბილბორდებზე მმართველი გუნდის მამაკაცი ლიდერების ფოტოების გამოფენაც. ის სალომე ზურაბიშვილის ინაუგურაციასაც ესწრებოდა.
სიძულვილის კამპანიებით ცნობილი კლუგჰაფტი ხშირად ხდება კრიტიკის ობიექტი.
მისი ჩამოსვლა შეიძლება ითქვას დაეტყო ხელისუფლების პიარ სტრატეგიას. ბოლო დღეების განმავლობაში სოციალურ ქსელებში და სახელისუფლო მედიაში აქტიურად მიმდინარეობს საპროტესტო აქციების ორგანიზატორების დისკრედიტაციის კამპანია.
