საერთაშორისო გამჭვირვალობის” მიერ გამოქვეყნებული “კორუფციის აღქმის ინდექსის” 2018 წლის კვლევის მიხედვით, მიუხედავად იმისა, რომ საქართველო აღმოსავლეთ ევროპისა და ცენტრალური აზიის რეგიონის ლიდერად რჩება, თუ მთავრობა სასწრაფოდ არ გადადგამს ნაბიჯებს ინსტიტუტების, მათ შორის სასამართლოს დამოუკიდებლობის უზრუნველსაყოფად, და არ დაუჭერს მხარს სამოქალაქო საზოგადოებას, მდგომარეობა შეიძლება ადვილად გაუარესდეს.
გასულმა წელმა ცხადყო, რომ საქართველოში დემოკრატია უკან დახევის წინაშეა, რაც მაღალი დონის კორუფციის საფრთხეს ქმნის, ნათქვამია ანგარიშში; ამის მიზეზად სამართალდამცველთა ანგარიშვალდებულების სიმცირე, სასამართლოს სისტემაში არსებული კორუფცია და პოლიტიკური ჩარევები, სახელმწიფოს მიტაცება და სამოქალაქო საზოგადოებაზე მთავრობის მხრიდან მხარდაჭერილი თავდასხმები სახელდება. “მიუხედავად მთავრობაში კორუფციის და დარღვევების შემთხვევების სასწრაფო გამოძიების საჭიროებისა, საქართველომ ვერ მოახერხა შეექმნა დამოუკიდებელი უწყება, რომელიც ამ ფუნქციას განახორციელებდა; დაუსჯელობა ასაზრდოებს მოსახლეობის უნდობლობას; “საერთაშორისო გამჭვირვალობის” კვლევის მიხედვით, მოსახლეობის 36 პროცენტს სჯერა, რომ თანამდებობის პირები ძალაუფლებას პირადი სარგებლობისთვის იყენებენ”, ნათქვამია ანგარიშში, სადაც აღნიშნულია, რომ 2013 წელს გამოკითხულთა მხოლოდ 12 პროცენტის ფიქრობდა ასე.
ანგარიშის თანახმად, რომელიც ვითარებას მსოფლიოს 180 ქვეყანასა და ტერიტორიაზე აფასებს, საქართველო შარშანდელთან შედარებით 5-ი საფეხურით არის დაწინაურებული და 58 ქულით 41-ე ადგილზეა; შარშან საქართველო 56 ქულით 46-ე ადგილზე იყო.
“საერთაშორისო გამჭვირვალობის” “კორუფციის აღქმის ინდექსის” კვლევაში საქართველოს იმ ქვეყნების სიაშია მოხვედრილი, რომელთაც განსაკუთრებული ყურადღებით უნდა დააკვირდნენ მომავალი წლების განმავლობაში.