სამოქალაქო მოძრაობა ,,შეცვალეს” წარმომადგენლებმა რეგიონული განვითარების და ინსტრასტრუქტურის სამინისტროსთან წყლით სავსე სათლები მიიტანეს. მათ ამ ფორმით სამთო კურორტებზე წყლის პრობლემა გააპროტესტეს.
მოძრაობის წევრებს სამინისტროს კარი დაკეტილი დახვდათ. საპატრულო პოლიციამ სამინისტროს შენობაში შესვლის უფლება არ მისცა.
,,მათ ეშინიათ საკუთარი მოქალაქეების, დღისით-მზისით, სამუშაო პერიოდში დაკეტეს სამინისტროს კარი, რადგან შეეშინდათ ჩვენი მოძრაობის წევრების. ჩვენ უბრალოდ გვინდოდა წყლით სავსე ვედრო დაგვეტოვებინა მათთვის და ცოტათი მაინც დავხმარებოდით გუდაურსა და ბაკურიანში ჩავარდნილ ტურისტულ სეზონს”, – განაცხადა აქციის ერთ-ერთმა მონაწილემ.
შეგახსენებთ, რომ ერთ კვირაზე მეტია გუდაურსა და ბაკურიანს წყალი არ მიეწოდება, პრობლემის გადაჭრას მთავრობა ვერ ახერხებს. პრემიერ-მინისტრის თქმით, მთავრობას პრევენციულად მეტი მუშაობა მართებდა და ეს პრობლემა უნდა მოეგვარებინა.
