არქეოლოგმა არმანდ მიჯარესმა ფილიპინების გამოქვაბულში ძვლების უცნაური ნარჩენები იპოვა. ძვლები ძალიან ჰგავს ადამიანისას, მაგრამ არც იმდენად, რომ იგივე სახეობად ჩაითვალოს.
ჰომინიდების ჯგუფის პრიმატი ადამიანის ერთგვარი ბიძაშვილია, რომელიც მასზე გაცილებით დაბალია და ლიტერატურულ პერსონაჟებს, მცირე ზომის ჰობიტებს ჩამოჰგავს. მას ლათინურად Homo Luzonensis უწოდეს.
აღმოჩენის პრეზენტაცია ფილიპინების დედაქალაქ მანილაში ხუთშაბათს, 11 აპრილს გაიმართა. არქეოლოგ არმანდ მიჯარესის თქმით, პრიმატი დედამიწაზე დაახლოებით 50 ათასიდან 67 ათასამდე წლის წინ სახლობდა. მეცნიერი ასევე ამბობს, რომ ამ სახეობის წარმომადგენლები სავარაუდოდ, აღმოჩენის ადგილზე არ ცხოვრობდნენ, მათი ძვლები გამოქვაბულში შესაძლოა წყალმა შერეცხა.
