{{ARTICLEIMAGE}}
იუსტიციის უმაღლესმა საბჭომ უზენაეს სასამართლოში წარსადგენი მოსამართლეთა 10 კანდიდატურა დაასახელა. წევრთა სია ასეთია: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე. ამის შესახებ განცხადება იუსტიციის უმაღლესის საბჭოს მდივანმა გიორგი მიქაუტაძემ დღევანდელ სხდომაზე გააკეთა. ამის შემდეგ იუსტიციის უმაღლეს საბჭოს არამოსამართლე წევრმა ანა დოლიძემ სხდომა პროტესტის ნიშნად დატოვა. “დღეს თქვენ პროცესუალურად და შინაარსობრივად, ჩვეულებრივი სუიციდი ჩაიდინეთ, ამას ქართველი ხალხის სახელით გეუბნებით, მიმართა მან გიორგი მიქაუტაძეს.
“მიუხედავად მთელი ჩემი კრიტიკისა თქვენი და სასამართლო სისტემის მიმართ, ნამდვილად არ მეგონა, საკუთარი კარიერის გადასარჩენად თუ ამ დონემდე დაეცემოდით, იმ ბოლო ტოტსა და ნაფოტს გადახერხავდით, რომელზეც სასამართლო ხელისუფლება კიდია. იუსტიციის საბჭოს უმრავლესობამ რეალურად ხელიდან გაუშვა ისტორიული შანსი, რომ საბჭოს შეესრულებინა დამოუკიდებელი კონსტიტუციური ორგანოს აღმატებული ფუნქცია, უდიდესი მოვალეობა და პასუხისმგებლობა, რომელიც კონსტიტუციამ თქვენ დაგაკისრათ”, მიმართა საბჭოს წევრების უმრავლესობას ანა დოლიძემ. მოგვიანებით, ანა დოლიძემ “ტვპირველის” ეთერში განაცხადა, რომ ეს არის სამარცხვინო გადაწყვეტილება და მოსამართლეების გვარები სწრაფად, ხაშლამასავით ჩამოატარეს საბჭოში, რომ რაც შეიძლება მალე დაესახელებინათ – “ეს არის პენალტი “ქართული ოცნების” კარში, ეს პენალტი მათ საკუთარ პარტიას და ქვეყანას გაუტანეს”.
“და როდის მოხდა ეს?!ახალი წლის წინ, ჩურჩხელაა თუ გოზინაყი რომ სუფრაზე დავდოთ?!”,თქვა ანა დოლიძემ.
უზენაეს სასამართლოში წარსადგენ მოსამართლეთა კანდიდატურების კენჭისყრის პროცესში მონაწილეობა არ მიუღიათ არამოსამართლე წევრებს:ნაზი ჯანეზაშვილს, ირმა გელაშვილსა და ანა დოლიძეს.