“პოლიციას ჰქონდა პირდაპირი ვალდებულება სახელმწიფო ინსტიტუტი დაეცვა ორგანიზებული შტურმისგან“– გიორგი გახარია უმრავლესობის სხდომაზე

“ეს იყო ერთმნიშვნელოვნად პარლამენტის შტურმის ღამე.სხვა საკითხი არის გამომწვევი მიზეზები და სხვა საკითხი არის რა შედეგებით დასრულდება გამოძიება, როგორც ერთი, ასევე მეორე მიმართულებით.და აქ ალბათ გარკვეული დრო საჭიროა, თუმცა ფაქტები არის შემდეგი:

ჩვენ გვქონდა მშვიდობიანი აქცია, რომელიც რაღაც მომენტში გახდა ძალადობრივი. აქციამ ძალადობრივი ფორმა მიიღო დაახლოებით ათი საათისთვის, როცა პოლიციას ქონდა უკვე აბსოლუტურად ლეგიტიმური უფლება ძალის გამოყენების, მაგრამ პოლიცია ორსაათნახევრის განმავლობაში იყო მოთმინების რეჟიმში, რადგან მათ დავალებული ქონდათ თავიდან აერიდებინათ ფიზიკური დაპირისპირება და ყოფილიყვნენ თავდაცვის რეჟიმში. ამიტომაც ვერცერთ ფაქტს ვერ მანახებთ, რომ პოლიციას ერთი ნაბიჯით მაინც დაეტოვებინოს პარლამენტის პერიმეტრი.

რაღაც მომენტში დაიწყო უკვე მასირებული, ორგანიზებული სხვადასხვა ჯგუფებით რამოდენიმე მხრიდან შტურმი, შეტევა ხდებოდა სხვადასხვა მხრიდან და პოლიცია იძულებული გახდა გამოეყენებინა სპეცსაშუალებები.სანამ პოლიცია გამოიყენებდა სპეცაღჭურვილობას, ამ ორსაათნახევრის განმავლობაში პოლიციელებს თავადმსხმელებმა გასტაცეს 300ზე მეტი ფარი,და 30-ზე მეტი პოლიციელი იყო გატაცებული მათი რიგებიდან. და მათი მდგომარეობა ბოლომდე არ იყო ცნობილი.ეს იყო სიტუაციის დინამიკა.

მაშინ როდესაც გაჩნდა აშკარა პირდაპირი რისკი რომ პოლიციის კორდონი იქნებოდა გარღვეული და თავდამსხმელები – ხაზგასმით არ ვამბობ მომიტინგეებს– იქ იყვნენ მშვიდობიანი ადამიანებიც, თუმცა იყო კარგად ორგანიზებული ჯგუფები, რომლებსაც ქონდათ მიზანი შეჭრილიყვნენ პარლამენტის შენობაში, დადგა მომენტი, როცა სპეცსაშუალებების გამოყენება დაიწყო.რა თქმა უნდა სპეცდანიშნულების ქვედანაყოფებს თავიანთი ბაზები არ დაუტოვებიათ გეგმის გარეშე, რომელშიც გაწერილი იყო ყველა ის ნაბიჯი რისი გადადგმაც მათ შეეძლოთ. მათ შორის სპეცსაშუალებების რეგლამენტი.

რა თქმა უნდა, იყო გარკვეული ფაქტები უფლებამოსილების გადამეტების, მაგრამ როგორც კი აქცია გახდა ძალადობრივი, შს სამინისტრომ გააკეთა რამდენიმე განცხადება მითითებით, რომ გთხოვთ დატოვოთ პარლამენტის წინ ტერიტორია. მე პირადად ეს განცხადება გავაკეთე ამ შენობაში შემოსვლის დროს. ისევე როგორც ქალაქის მერმა ოფიციალურად მიმართა მომიტინგეებს. ტექნოლოგიურად სხვადასხვა სახის სპეცსაშულაებების , მაგალითად წყლის ჭურვისგამოყენების დროს რა თქმა უნდა ასეთი გაფრთხილება არსებობდა, თუმცა გადაუდებელი მოგერიების პირობებში არც კანონი არ გვავალდებულებდა და არც საშუალება არ იყო ასეთი გაფრთხილების, შესაბამისად სპეკულირებაა ყველაფერი როდესაც გაფრთხილების თემა ხდება აქტუალური, ისევე როგორც სპეკულირებაა რეზინის ტყვიების გამოყენების ან მათი სახეობის ნაწილში. არცერთი ნაკლებად ლეტალური, თუდაც ასეთი განმარტებით რეზინის ტყვია შს აღჭურვილობაში არ არსებობს და სხვა ყველაფერი არის ტყუილი.

შესაბამისად როდესაც ვსაუბრობთ ამ ღონისიძებაზე უნდა გვესმოდეს ერთი რამ.

მე არ ვაკეთებ პოლიტიკურ შეფასებას , რა მიზანი ქონდა პარლამენტში შეჭრას, მაგრამ ფაქტია, რომ ეს იყო ორგანიზებული ჯგუფების მიერ ძალადობრივი მცდელობა შტურმის საშუალებით პარლამენტში შეჭრის მაშინ, როდესაც ამ დროს, ღამის საათებში, როდესაც პარლამენტი არ ფუნქციონირებს პარლამენტში უკვე იმყოფებოდა უამრავი ადამიანი, რომელსაც არავითარი კავშირი პარლამენტის მუშაობასთან არ ქონდა და ამის შემდომ არსებობდა პირდაპირი მოწოდებები პოლიტიკური ჯგუფების და პოლიტიკური ლიდერების, რომლებიც დღეს საუბრობენ იმაზე, რომ ისინი ცდილობდნენ მშვიდობიანი გზით მოეგვარებინათ კონფლიქტი და ასე შემდეგ, როდესად ისინი ოფიციალურად აცხადებდნენ და გვეუბნებოდნენ, რომ ჩვენ ამ ხალს უკვე ვეღარ ვაკონტროლებთ.

პოლიტიკური შეფასების ნაწილი აქ არის ძალიან მარტივი. ჩვენ გვქონდა მშვიდობიანი აქცია, რომელიც გარდაიქმნა ძალადობრივად და ეს აშკარად ჩანს გადაღებულ კადრებზეც, კონკრეტული პოლიტიკური ლიდერების მოწოდების შემდგომ რომელმაც მიიღო საბოლოოდ ორგანიზებული შტურმის სახე პარლამენტის შენობაზე და ამის შემდეგ ჩვენ გვაქვს შედეგი, როდესაც პოლიტიკური ძალები და ლიდერები რომლებიც იყვნენ ამ აქციის ორგანიზატორები, რომელიც დამთავრდა ასეთი სამწუხარო შედეგებით, არათუ პასუხისმგებლობას არ იღებენ, ამ აქციაზე, საერთოდ ამ პასუხისმგებლობაზე საუბრაიც არ უნდათ და საერთოდ მათი მხრიდან ძალადობრივი გზით პოლიტიკური ბრძოლის დაგმობაც არ მოგვისმენია.“–განაცხადა გახარიამ.