ქეთევან წამებულის გამზირზე მდებარე ბინაში, სადაც გუშინ 7 ადამიანი გარდაიცვალა კრიმინალისტებმა მუშაობა დაასრულეს. ბინა ამ დროისთვის დალუქულია. წინასწარი ინფორმაციით ტრაგედიის მიზეზად გაზის გამაცხელებლის მილში ნამწვის დაგროვება სახელდება. ექსპერტების თქმით მილში გაურკვეველი ნივთი იყო გაჭედილი, სავარაუდოდ ჩიტის ბუდე, რამაც ნამწვის გატარებას ხელი შეუშალა და ბინაში CO დაგროვდა, რამაც შვიდი მამაკაცის სიკვდილი გამოიწვია.
გარდაცვლილს შორის არიან მამა– შვილი და ორი ძმა. ისინი რეგიონიდან იყვნენ ჩამოსული, თბილისში მშენებლობაზე მუშაობდნენ და ბინას ერთად ქირაობდნენ. მათი ცხედრების ექსპერტიზა უკვე დასრულებულია და გარდაცვლილები საკუთარ სახლებში – რუსთავში, გორში, ასპინძაში და ზესტაფონში გადაასვენეს.
ყაზტრანსგაზ თბილისმა გუშინვე გაავრცელა ინფორმაცია, რომ ბინაში, სადაც ტრაგედია მოხდა გაზის გამათბობელი თვითნებურად, კუსტარულად იყო დამონტაჟებული. ყაზტრანსგაზის წარმომადგენლებმა მარტში გეგმიური რევიზიის დროს გამათბობელი ჩაჭრეს და შესაბამისი ოქმიც შეადგინეს, თუმცა ბინის მეპატრონემ გამაცხელებელი თვითნებურად შეაერთა.
ტრაგედიასთან დაკავშირებით გამოძიება დაწყებულია სსკ-ს 240-ე მუხლის პრიმა მუხლით, რაც ექსპლუატაციის წესების დარღვევის გამო ორი ან მეტი ადამიანის სიცოცხლის მოსპობას გულისხმობს. ბინის მეპატრონე გუშინ პოლიციაში გამოკითხვაზე იმყოფებოდა.