ზედმეტი წონა თანამედროვეობის ერთერთი ყველაზე გავრცელებული პრობლემაა. ის ჩვენს ჯანმრთელობას სერიოზულ საფრთხეს უქმნის. ზედმეტ წონასთან ბრძოლა კი მუდმივად აქტუალური საკითხია. რა მოხდება, თუ ზედმეტ კილოგრამებს სწრაფად დავიკლებთ. მოდით ვნახოთ რა მოსდის ჩვენს სხეულს და ტვინს წონის კლებასთან ერთად.
ცხიმოვანი ქსოვილები ისევე არის კაპილარებით და დაქსელილი, როგორც კუნთები. ამის გამო, რაც უფრო მეტია ზედმეტი წონა, მით მეტი მოცულობის სისხლის გადაქაჩვა უწევს გულს. ეს კი მის გადატვირთვას იწვევს. ამიტომ წონის კლება ხელს უწყობს სისხლის მიმოქცევას ყველა ორგანოში, შესაბამისად, ჩვენს ტვინსაც სისხლი უფრო ადვილად მიეწოდება და მისი მუშაობა უმჯობესდება.
მრავალმა კვლევამ დაადასტურა, რომ წონის მნიშვნელოვანი კლების შემდეგ ადამიანებს მეხსიერების, კონცენტრაციის და ანალიტიკური უნარების გაუმჯობესება აღენიშნებათ.
არასწორი დიეტის დროს ხშირად ცხიმის ნაცვლად კუნთოვანი მასა მცირდება. რაც ორგანიზმზე ნეგატიურად აისახება. საქმე იმაშია, რომ ორგანიზმისთვის ნახშირწყლების და ცილების დაწვა უფრო ადვილია, ვიდრე ცხიმოვანი უჯრედების, განსაკუთრებით, თუ წონაში კლება მეტისმეტად სწრაფია. იმისათვის, რომ წონაში სწორად დაიკლოთ, აუცილებელია ყოველდღიური თუნდაც მარტივი ვარჯიში, რაც იმ ჰორმონების წარმოქმნას შეუწყობს ხელს, რომლებიც ცილოვან სტრუქტურებს ახალი უჯრედების წარმოქმნისა და აღდგენისკენ უბიძგებს. ასეთ შემთხვევაში ჩვენს სხეულს ისღა დარჩენია ენერგიის წყაროდ ცხიმი და ნახშირწყლები გამოიყენოს, რაც იმას ნიშნავს, რომ სხეული წონის კლების პარალელურად სხეული კვლავ ენერგიული და აქტიური იქნება.
ზედმეტი წონა თქვენს სახსრებზე დიდ ზეწოლას ახდენს.არ აქვს მნიშვნელობა, დარბიხართ, ზიხართ თუ წევხართ. ყოველი დაკლებული კილოგრამი სახსრებზე დაწოლას ოთხი კილოგრამით ამცირებს. შესაბამისად, სწორი კვებით და წონის კლებით შეძლებთ სახსრების ბევრი დაავადების თავიდან აცილებას და კუნთ–სახსროვანი სისტემის ჯანმრთელობის შენარჩუნებას.
ინსულინი ერთ ერთი მნიშვნელოვანი ჰორმონია, რომელიც საკვების ათვისების პროცესზე დიდ გავლენას ახდენს. ზედმეტი წონა ინსულინისადმი მგრძნობელობის შემცირებასაც იწვევს, რის გამოც ჭარბწონიანებს ხშირად ქრონიკული შიმშილის გრძნობა და ქრონიკული დაღლილობა აღენიშნებათ. ტკბილი და ცხიმიანი საკვების შემცირების, ასევე საკვების ულუფების შემცირების შემდეგ ორგანიზმი ინსულინის მიმართ უფრო მგრძნობიარე ხდება. შედეგად ნაკლები საკვების მიღებით ბევრად მეტ ენერგიას მიიღებთ. შიმშილის დაუძლეველი გრძნობა და სტრესი, რაც დიეტის დაწყებისას გაწუხებთ, რამდენიმე კვირაში გაქრება როდესაც სხეული ჰორმონების სწორად გამომუშავებას მიეჩვევა.
კვლევების შედეგად, რომელიც ტვინის სკანირებასაც მოიცავდა, მეცნიერებმა დაადგინეს, რომ დაკლებული ზედმეტი წონის 9 თვის მანძილზე შენარჩუნების შემდეგ ადამიანები კალორიული საკვების გამოსახულების დანახვისას განსხვავებულად რეაგირებდნენ, ვიდრე წონის დაკლებამდე. მოტივაციაზე , წახალისებაზე და გემოზე პასუხისმგებელი ტვინის უბნები საკვების დანახვაზე უფრო სუსტად რეაგირებდნენ, ვიდრე ის უბნები, რომლებიც თვითკონტროლზე არიან პასუხისმგებელი. ამგვარად, საკვების მიმართ დამოკიდებულება დროთა განმავლობაში იცვლება და ორგანიზმი კვების ახალ, ზომიერ რეჟიმს ეჩვევა. ასე რომ, ყველაზე რთული წონის კლებისას პირველი რამდენიმე კვირაა.
