“მწვანე სკოლის“ დამფუძნებელი, რომლის ყოფილმა მოსწავლემ თვითმკვლელობა სცადა განცხადებას ავრცელებს. სწორედ სკოლაში მომხდარი ინციდენტი და პოლიციის ჩარევა უძღოდა წინ 15 წლის ლუკას გადაწყვეტილებას 9 სართულიდან გადმომხტარიყო. ბაკურ სულაკაური ინციდენტის შესახებ ფეისბუქზე წერს და ამბობს, რომ სკოლამ კანონის შესაბამისად იმოქმედა:
“მე ვარ „მწვანე სკოლის“ თანადამფუძნებელი და ერთ-ერთი დირექტორი. მინდა, გამოვეხმაურო საზოგადოებაში, მედიასა და სოციალურ ქსელებში მოზარდის თვითმკვლელობის მცდელობის ფაქტს, რომელშიც „მწვანე სკოლაც“ ფიგურირებს.
იმ დროს, როდესაც მოზარდი სიკვდილს ებრძვის, ძალიან მიმძიმს ამ ყველაფერზე საუბარი. მესმის და ვიზიარებ ყველა იმ ადამიანის გულისწყრომას და ბრაზს, რომელიც სამართლიანად შეძრულია ამ ფაქტის გამო. ახლა, მხოლოდ ბავშვის გადარჩენა და გამოჯანმრთელებაა უმთავრესი – დანარჩენი ყველაფერი მეასეხარისხოვანია.
ამავდროულად, როგორც სკოლის ერთ-ერთ ხელმძღვანელს, პასუხისმგებლობა მაკისრია, საზოგადოებაში გაჩენილ კითხვებს ვუპასუხო ან რიგ შემთხვევებში არასწორად აღქმული ამბის ნამდვილი ვერსია მოგიყვეთ.
ამ ტრაგიკული შემთხვევის შესახებ შეფასებების გაკეთებისას მნიშვნელოვანია ვიცოდეთ რამდენიმე ფაქტი:
შემთხვევა მოხდა ღამით. დილით სკოლაში შესულ მოსწავლეებს, მასწავლებლებს და თანამშრომლებს დახვდათ წითელი საღებავით დაზიანებული კედლები, კარადები, ნახატები, ვიდეოკამერები და სხვ. აქ არ არის საუბარი მხოლოდ იმ ერთ წარწერაზე, რომელიც სოციალურ ქსელებში ვრცელდება. ვიდოკამერების ჩანაწერებით ჩვენ ვერ მოვახერხეთ სკოლის ტერიტორიაზე ღამის საათებში შემოსული პირის იდენტიფიცირება. თუმცა დანამდვილებით დავადგინეთ, რომ შემოსული პირი სკოლის არც ერთი მოსწავლე, მასწავლებელი ან თანამშრომელი არ იყო. ამის შემდეგ სკოლამ იმოქმედა კანონის შესაბამისად. სკოლის დაცვის სამსახურს კანონი და სკოლის შინაგანაწესი ავალდებულებს, რომ ასეთ სიტუაციებში საპატრულო პოლიციას მიმართოს. ეს არა მხოლოდ კანონმდებლობით გათვალისწინებული ნაბიჯი, არამედ სკოლის მოსწავლეების, მათი მშობლების და თანამშრომლების ნაწილის სურვილი იყო, სკოლას კი ამის არც შესაძლებლობა ჰქონდა და არც – უფლებამოსილება.
ზოგიერთი გვაკრიტიკებს იმის გამო, რომ არ გამოვიძახეთ სოციალური სამსახური და ფსიქოლოგიური დახმარება არ გავუწიეთ მოზარდს. სკოლამ ვერ დაადგინა სკოლის ტერიტორიაზე შემოსული პირის ვინაობა და ბუნებრივია, ვერც იმას მიხვდებოდა, ეს პირი სრულწლოვანი იყო თუ არასწრულწლოვანი, სჭირდებოდა თუ არ სჭირდებოდა ფსიქოლოგიური დახმარება. მას შემდეგ, რაც შემდგომი მოკვლევით პოლიციამ დაადგინა პირის ვინაობა, აღმოჩნდა, რომ ის მწვანე სკოლის ყოფილი მოსწავლე იყო.
სოციალურ ქსელებში „მწვანე სკოლას“ საყვედურობენ, რომ მან მოზარდი პოლიციაში „ჩაუშვა“. სინამდვილეში სკოლამ იმოქმედა კანონისა და მოსწავლეების ინტერესების შესაბამისად. კანონდარღვევის პოლიციისთვის შეტყობინება „ჩაშვება“ არ არის.
კიდევ ერთი არასწორი აღქმა, რაც ამ ორ დღეში ჩამოყალიბდა, იყო ის, თითქოს მოზარდი „სკოლიდან გააგდეს“, რაც ასევე არ შეესაბამება სიმართლეს. ბავშვი მართლაც სწავლობდა მწვანე სკოლაში რამდენიმე თვის განმავლობაში და სექტემბერში, მშობლის განცხადების საფუძველზე და მათივე სურვილით გადაიყვანეს ერთ-ერთ საჯარო სკოლაში.
კიდევ ერთხელ ხაზგასმით აღვნიშნავ: სკოლამ საპატრულო პოლიციას მხოლოდ მას შემდეგ მიმართა, რაც რამდენიმესაათიანი მცდელობის შედეგად დაადგინა, რომ სკოლაში ღამით შემოსული პირი ნამდვილად არ იყო ჩვენი სკოლის მოსწავლე. სკოლას არ შეეძლო ეს საქმე გამოუძიებელი დაეტოვებინა. ჩვენთვის უმთავრესი მოსწავლეების უსაფრთხოებაა.
კიდევ ბევრი კითხვა და დაუსაბუთებელი აღქმა წავიკითხე და მოვისმინე ამ დღეებში. ბუნებრივია, ყველას ამ ერთი პოსტით ვერ ვუპასუხებ. მაგრამ ამ პოსტის შემდეგ კითხვები თუ კიდევ დარჩება, მზად ვარ, შევაჯამო და დამატებით გიპასუხოთ, აგიხსნათ და განგიმარტოთ.
ისევ დავუბრუნდები ყველაზე მთავარს – ბავშვის სიცოცხლეს და ჯანმრთელობას. ამაზე მნიშვნელოვანი ამ წუთას არაფერია.“– წერს ბაკურ სულაკაური.
შეგახსენებთ, რომ 15 წლის თბილისელი მოსწავლე იაშვილის კლინიკაში სიკვდილს ებრძვის, ექიმების შეფასებით, მისი მდგომარეობა უმძიმესია, მრავლობითი მოტეხილობები და თავის ქალის მძიმე ტრავმა. ლუკა ოთხშაბათს, 9 სართულიდან გადახტა და მეოთხე დღეა მართვით სუნთქვაზეა.
თვითმკვლელობის მცდელობამდე, სამშაბათს და ოთხშაბათს არასრულწლოვანი შსს-ს დიდუბე ჩუღურეთის პოლიციის სამმართველოს დიღმის მასივის პირველ განყოფილებაში პოლიციელებმა გამოჰკითხეს, თბილისის „მწვანე სკოლაში“ მომხდარი ინციდენტის გამო.
სკოლის და პოლიციის ვერსიით, იგი ღამით, მაშინ, როცა სასწავლო პროცესი არ მიმდინარეობდა, ღობეზე გადაძვრა, „მწვანე სკოლის“ ტერიტორიაზე გადავიდა და სკოლის და ადმინისტრაციის შენობების კედლებზე სხვადასხვა შინაარსის წარწერები დატოვა, მათ შორის, „ამ ცხოვრების დედაც“, „აბა დამიჭირე“, Fack (Fuck-ის ნაცვლად).
მოზარდის თვითმკვლელობის მცდელობის მიზეზად მის მიმართ პოლიციაში განხორციელებული ზეწოლა სახელდება. მოზარდის ძმა ყვება, რომ პოლიციელებმა მასზე ფსიქოლოგიურად იძალადეს.
“ცუდად გამხდარა და სასწრაფოც არ გამოიძახეს. თავიდან ჩვენება მისცა და თქვა, რომ სკოლის კედლებზე წარწერები მე გავაკეთეო, მეორე დღეს ეს ჩვენება გადათქვა. ემუქრებოდნენ, მათ შორის იმით, რომ პრობლემებს მეც შემიქმნიდნენ, სამხედრო აკადემიიდან გამოვაგდებინებთ შენს ძმასო ასე უთქვამთ. რაღაც დროით დაიმარტოხელეს და განყოფილებიდან ატირებული გამოსულა“ – ამბობს ბექა.
