თავდაცვის სამინისტრო სამხედრო მფრინავ ეკა ქვლივიძის მიმართ სასამართლოდან სარჩელს გამოითხოვს – მოლაპარაკება თავდაცვის მინისტრსა და სამხედრო მფრინავს შორის შეთანხმებით დასრულდა. ეკატერინე ქვლივიძე მუსაობას თავდაცვის სამინისტროში კვლავ გააგრძელებს.
თავად ყოფილი სამხედრო მფრინავი შეხვედრის შედეგით კმაყოფილია.
“ორივე მხარის პოზიცია იქნა გათვალისწინებული. თავდაცვის სამინისტრო სარჩელს გამოიხმობს. პარალელურად, ჩემი კვალიფიკაციის შენარჩუნების მიზნით მექნება საშუალება, რომ სამოქალაქო განხრით ვიფრინო, ჩემი კვალიფიკაცია შევინარჩუნო. ასევე, მზაობა გამოვხატე, რომ გორში, სამხედრო აკადემიაში, როგორც მოწვეულმა სპეციალისტმა ლექციები ჩავატარო და მომავალ თაობას ვასწავლო. როგორც კი პრაქტიკული ფრენების განხორციელების საშუალება მექნება, როგორც მფრინავს, თავდაცვის სამინისტროში დავბრუნდები და აღვდგები, როგორც სპეციალისტი სამხედრო კადრი. ცუდია, რომ აქამდე ვერ შედგა ჩვენი მოლაპარაკება, ამა თუ იმ ფაქტორების გათვალისწინებით. დღევანდელი მოლაპარაკება გონივრული და შედეგზე ორიენტირებული იყო”, განაცხადა შეხვედრიდან გამოსულმა ეკატერინე ქვლივიძემ.
კონტრაქტის ცალმხრივად ვადაზე ადრე შეწყვეტის გამო თავდაცვის სამინისტრო სამხედრო მფრინავისგან ჯარიმის სახით 28 000 ლარის გადახდას ითხოვდა.
