დღეს თერთმეტი საათისთვის თბილისის მეტროპოლიტენის პირველი ხაზი გაჩერდა. შეფერხება მეტროსადგურ სადგურის მოედანზე ერთ–ერთ მატარებელზე ტექნიკურმა ხარვეზმა გამოიწვია. მგზავრებს მატარებლები დაატოვებინეს და მეტროს პირველი ხაზის მუშაობა შეჩერდა. ტექნიკური პრობლემის აღმოსაფხვრელად მატარებელი მოსაბრუნებელ ჩიხში გადაიტყვანეს. მეტროპოლიტენის ფუნქციონირება დაახლოებით ნახევარ საათში აღდგა. თბილისის სატრანსპორტო კომპანიმ დღეს მომხდართან დაკავშირებით განცხადება გაავრცელა:
თბილისის სატრანსპორტო კომპანიის განცხადება
“თბილისის მეტროს პირველ ხაზზე აღდგა მატარებლების მოძრაობა და განახლდა მგზავრთა მიღება.
შეგახსენებთ, რომ დღეს მეტროსადგურ „სადგურის მოედანზე“ ტექნიკური მიზეზის გამო შეჩერდა მეტროს ერთი შემდგენლობა და საჭირო გახდა მისი ჩიხში გადაყვანა.
აღნიშნულის გამო თბილისის მეტროს პირველი ხაზი 15 წუთის განმავლობაში ვერ ემსახურებოდა მგზავრებს.
საბურთალოს ხაზზე შეფერხება არ ყოფილა.
თბილისის სატრანსპორტო კომპანია ბოდიშს გიხდით შექმნილი დისკომფორტისთვის“ – ნათქვამია განცხადებაში
