მომღერალი და მსახიობი ბუბა კიკაბიძე ბოლო ათი დღის მანძილზე მიმდინარე საპროტესტო აქციებს მხარდაჭერას უცხადებს და ახალგაზრდებს ბოდიშს უხდის, რადგან ჯანმრთელობის მდგომარეობის გამო აქციაზე ყოფნა არ შეუძლია. კიკაბიძის თქმით მთავრობა პირველივე დღეს სრული შემადგენლობით უნდა გადამდგარიყო. ტვ პირველთან ინტერვიუში ბუბა კიკაბიძემ განაცხადა.
“ეს იყო საზიზღრობა არაერთხელ მითქვამს. ეგ იყო გამიზნული ავანტურა. ეს ჩაფიქრებული იყო იქიდან. მე მაქვს ისეთი შეგრძნება, რომ მოსკოვი ელოდება აქ რამე მოხდეს რომ შემოვიდნენ “საშველად“.
ახლა დაითვალეს რა ზარალს მოგვაყენებს ტურისტების არჩამოსვლა, ღვინის არ მიღება. უნდათ იქამდე მიგვიყვანონ, რომ ვთქვათ, გვიშველეთ რუსებო, თქვენს იქით არავინ არ არის ჩვენი მშველელი. ეგ არის სისულელე.
მე ქედს ვიხრი ამ ახალგაზრდების წინაშე. ჩემი შვილიშვილის ხელები არიან.არ შემიძლია დგომა დიდი ხანი 81 წლის ვარ, მაგრამ ჩემს სათქმელს ყოველთვის ვამბობდი და ვამბობ. ახლა ახალი ისტორია იწერება საქართველოს პოლიტიკაში ამ ბიჭების და გოგოების მეშვეობით.
წესიერი მთავრობა მთლიანად გადადგებოდა პირველივე დღეს როცა სროლები ატყდა და ამდენი სისხლი დაიღვარა. ჩვენი უწესო მთავრობა ცდილობს რომ ეს გაამართლოს და ერთხმად იძახიან ახლა, რომ ამან გადაარჩინა საქართველო, გახარიამ უშველა საქართველოს. ეს ბავშვები არ დაიღლებიან.
რაც უფრო დააგვიანებს წასვლას, ეს გახარია. მით მეტი ჩირქი მოეცხობა მთელ მთავრობას. ამიტომ დროზე უნდა გადადგას ეს ნაბიჯი. მთავრობას გონია რომ საქართველოს მოქალაქეები არიან იდიოტები ყველაზე საშინელება ეს არის. გონიათ რომ ყველაფერს შევჭამთ. და არ ჭამს ეს ხალხი, ამოვიდა ყელში. “– ამბობს ბუბა კიკაბიძე.
