“რუსთავი2”-ის ყოფილი გენერალური დირექტორისთვის ბრალის წაყენებას, პოლიტიკოსები ეხმაურებიან. განცხადება “ნაციონალური მოძრაობის” ერთ-ერთმა ლიდერმა, რომან გოცირიძემ გააკეთა და მომხდარს პოლიტიკური ტერორი უწოდა.
ოპოზიური პარტიის ერთ-ერთი ლიდერი ამბობს, რომ ხელისუფლება ბიძინა ივანიშვილის დავალებით, ანადგურებს ყველაფერ იმას, რაც მასთან წინააღმდეგობაში მოდის.
მისი თქმით, ნიკა გვარამიასთვის წაყენებული ბრალი აბსურდულია, რადგან ედავებოდე ფინანსების მითვისებას ადამიანს, რომელმაც გაკოტრებული ტელევიზია ფეხზე დააყენა, რეალობასთან ვერ იქნება კავშირში.
“რასაც ახლა ხელისუფლება და ივანიშვილი სჩადის, ეს არის პოლიტიკური ტერორი. უკვე გადალახა ყველა საზღვარი, გონიერების ფარგლებს გასცდა ის რეპრესიები, რასაც ხელისუფლება სჩადის. გუშინ ტვ „პირველის“ მესაკუთრე იყო დაბარებული და რა თქმა უნდა მთავარი სამიზნე უკვე არის ტვ „პირველი“ „რუსთავი2“-ის შემდეგ. ნიკა გვარამიასადმი ბრალის წაყენება, აბსურდული ბრალდებით, გაკოტრებული ტელევიზია ხელისუფლების მიერ, დაყადაღებული ორი წლის განმავლობაში, ამ ადამიანმა საკუთარი ენერგიითა და უნარებით მოიტანა დღემდე და რაღაც ფინანსურ პრეტენზიებს უყენებენ.
ყველა ვინც კი დღეს საქართველოში არის რაიმე ფორმით პოლიტიკური წონადი, გავიხსენოთ ირაკლი ოქრუაშვილის დაპატიმრება, ნიკა მელიას შინა პატიმრობა და ვინც კი დაკავშირებულია თავისუფალ მედიასთან, ყველა არის ხელისუფლების სამიზნე. ხვალ შეიძლება ტვ „კავკასია“ გახდეს. ზეგ კიდევ მეორე, რომელიც არ ზის ხელისუფლების პროპაგანდისტულ ტალღაზე. ნიკა გვარამიასადმი დღეს წინასწარი პატიმრობის შეფარდება იქნებოდა საბოლოოდ დასამარება საქართველოში სასამართლო სისტემის,“-ამბობს რომან გოცირიძე.
