გერმანიაში მოკლული ზელიმხან ხანგოშვილის ცხედარი საქართველოში გვიან ღამით ჩამოასვენეს. თბილისის საერთაშორისო აეროპორტში მოკლულის ოჯახის წევრები და პანკისის ხეობის მცხოვრებლები იმყოფებოდნენ.
ზელიმხან ხანგოშვილს დღეს 14:00 საათზე პანკისის საგვარეულო სასაფლაოზე დაკრძალავენ.
შეგახსენებთ, რომ ზელიმხან ხანგოშვილი ბერლინში 23 აგვისტოს მოკლეს. გერმანული მედიის ცნობით, ველოსიპედით გამვლელმა ის ცეცხლსასროლი იარაღიდან თავის არეში სასიკვდილოდ იმ დროს დაჭრა, როცა ხანგოშვილი პარასკევის ლოცვაზე მეჩეთში მიდიოდა. მედიის ინფორმაციით, გერმანელმა სამართალდამცველებმა მკვლელობის ფაქტზე 49 წლის მამაკაცი დააკავეს, რომელიც რუსეთის მოქალაქეა.
მკვლელობასთან რუსეთის სპეციალური სამსახურების კავშირის შესახებ ინფორმაცია BBC-მგაავრცელა, თუმცა ოფიალური კრემლი ხანგოშვილის მკვლელობასთან კავშირს უარყოფს.
„შპიგელის“ ინფორმაციით, საქართველოში მისი მკვლელობის მცდელობის შემდეგ, ხანგოშვილი უკრაინაში გაემგზავრა, სადაც ადგილობრივ სპეცსამსახურებთან თანამშრომლობდა და რუსეთის გავლენის წინააღმდეგ იბრძოდა. მეორე თავდასხმის შემდეგ, 2015 წელს ხანგოშვილი ბერლინში გადავიდა საცხოვრებლად, სადაც თავშესაფარს ითხოვდა.
