პრემიერი: ქართველ დიპლომატებს დიდი წვლილი მიუძღვით ტერიტორიული მთლიანობის მშვიდობიანი გზით აღდგენის საქმეში

საქართველოს პრემიერ-მინისტრმა მამუკა ბახტაძემ თბილისში მიმდინარე ელჩების კონფერენციაზე ქართული დიპლომატიის მიღწევებზე ისაუბრა.

პრემიერის თქმით, მთავრობის პროგრამას საფუძვლად დაედო 5 პრინციპი, რომელთაგან უმთავრესია ქართველი ხალხის ცივილიზაციული არჩევანი – ევროპულ ოჯახში დაბრუნება და ევროატლანტიკურ სივრცეში საქართველოს შეუქცევადი ინტეგრაცია, ამ მიმართულებით კი წამყვანი როლი, რა თქმა უნდა, ქართულ დიპლომატიას ეკისრება.

ის, რომ “ქვეყანა დამაჯერებლად ადგას ევროკავშირისა და ევროატლანტიკური ალიანსისკენ მიმავალ გზას”, პრემიერი ქართული დიპლომატიის პროფესიონალიზმისა და თავდადებული შრომის ნათელ გამოხატულებად აფასებს.

“დაახლოებით ერთი თვის წინ ჩვენ ბრიუსელში გავმართეთ უნიკალური ფორმატის შეხვედრა ევროკომისიის პრეზიდენტთან და კოლეგა ევროკომისრებთან. ამ ფორმატის შეხვედრა, რომელშიც ევროკომისართა ფართო შემადგენლობა მონაწილეობდა, ადასტურებს ჩვენი ქვეყნისადმი ევროკავშირის ურყევ მხარდაჭერას და საქართველოს წარმატების კიდევ ერთი აღიარებაა დემოკრატიული რეფორმების განხორციელების კუთხით. ასევე ხაზგასასმელია 11-12 ივლისს გამართული NAთO-ს ბრიუსელის სამიტი, როდესაც პირველად მოხდა ჩრდილოატლანტიკური საბჭოს შეხვედრა საქართველოსა და უკრაინასთან სახელმწიფოებისა და მთავრობების მეთაურების დონეზე. ვფიქრობ, რომ ესეც ძალიან მნიშვნელოვანი გზავნილი იყო NAთO-ს მხრიდან. სამიტზე უმაღლეს დონეზე პირველად იქნა მიღებული NAთO-ს-საქართველოს კომისიის დეკლარაცია, რომელიც მოიცავს NAთO-ს-საქართველოს ურთიერთობების თითქმის ყველა პრიორიტეტულ მიმართულებას. ჩვენმა მოკავშირეებმა აღნიშნეს საქართველოს მიერ შავი ზღვის უსაფრთხოების განმტკიცების კუთხით შეტანილი მნიშვნელოვანი წვლილი და დასახეს საქართველოსთან ამ კუთხით შემდგომი თანამშრომლობის კონკრეტული მიმართულებები”.

პრემიერმა ხაზგასმით თქვა, რომ ქართველ დიპლომატებს დიდი წვლილი მიუძღვით საქართველოს სუვერენიტეტის განმტკიცებისა და ტერიტორიული მთლიანობის მშვიდობიანი გზით აღდგენის საქმეში. მისივე შეფასებით, სწორედ ქართული დიპლომატიის აქტიური მუშაობის შედეგია ის, რომ საერთაშორისო თანამეგობრობის დღის წესრიგში მთელი წლის განმავლობაში იდგა საქართველოს ოკუპირებული ტერიტორიების საკითხი, ყველა დონეზე კეთდებოდა მხარდამჭერი განცხადებები საქართველოს სუვერენიტეტისა და ტერიტორიული მთლიანობის მიმართ; აგრეთვე ვრცელდებოდა მოწოდებები რუსეთის მიმართ 2008 წლის 12 აგვისტოს ცეცხლის შეწყვეტის შეთანხმების შესრულებისა და ოკუპირებული ტერიტორიებიდან სამხედრო ძალების გაყვანის მოთხოვნით. საქართველოს ტერიტორიული მთლიანობის მხარდაჭერა და რუსეთის აგრესიული პოლიტიკით შეშფოთება მაღალ დონეზე გამოხატეს ასევე აგვისტოს ომის 10 წლისთავზე საქართველოში ჩამოსულმა პარტნიორი ქვეყნების მაღალი დონის წარმომადგენლებმა.

მამუკა ბახტაძემ აშშ-სთან ურთიერთობებზეც გაამახვილა ყურადღება. მისი თქმით, გასულ წელს კიდევ უფრო მჭიდრო გახდა ურთიერთობები მთავარ სტრატეგიულ პარტნიორთან, რისი ნათელი დადასტურებაა სულ ახლახან მიღებული საქართველოს მხარდამჭერი ორპარტიული საკანონმდებლო აქტი. “მინდა მადლობა გადავუხადო ჩვენს ამერიკელ მეგობრებს ასეთი დიდი მხარდაჭერისთვის და საქართველოს გვერდში დგომისთვის. ამ ორპარტიულ საკანონმდებლო აქტში წამოჭრილია ჩვენი ქვეყნისთვის ბევრი მნიშვნელოვანი საკითხი, დასმულია სწორი აქცენტები და გაკეთებულია ძლიერი გზავნილები ისეთ თემებზე, როგორიცაა ჩვენი ქვეყნის ტერიტორიული მთლიანობა, თავისუფალი ვაჭრობის ხელშეკრულების პერსპექტივა და უსაფრთხოების უზრუნველყოფა”.

პრემიერმა აღნიშნული დოკუმენტიდან მთავარი გზავნილები გამოყო: დაგმობილია რუსეთის მიერ საქართველოს რეგიონების – აფხაზეთისა და ცხინვალის რეგიონის ოკუპაცია; ასევე, ოკუპირებულ რეგიონებში განხორციელებული დაკავების, გატაცებისა და ადამიანის უფლებათა დარღვევის შემთხვევები და, შესაბამისად, ეხმიანება ოთხოზორია-ტატუნაშვილის სიასთან დაკავშირებით საქართველოს პარლამენტის რეზოლუციას. მნიშვნელოვანია ასევე, რომ ორპარტიული აქტი ითვალისწინებს რუსეთის მიერ ოკუპირებულ საქართველოს ტერიტორიებზე ადამიანის უფლებათა უხეშ დამრღვევთა წინააღმდეგ სანქციების შემოღებას.

პრემიერის შეფასებით, ქართული დიპლომატიის დამსახურებაა აგრეთვე ის მნიშვნელოვანი ნაბიჯები, რომლებიც ევროპის ქვეყნებთან თანამშრომლობის გაღრმავებისკენ გადაიდგა და, რაც მთავარია, ამ ურთიერთობის დინამიკა სულ უფრო მზარდია.

“ამ მხრივ გამოვყოფდი წარმატებულ ვიზიტებს ბრიუსელში, სადაც გვქონდა შეხვედრები ევროკავშირისა და ნატოს წარმომადგენლებთან, აგრეთვე მაღალი რანგის შეხვედრები ვაშინგტონსა და ნიუ-იორკში გაეროს გენერალური ასამბლეის ფარგლებში. ვიზიტები შედგა ასევე ჩვენს მეზობელ ქვეყნებში – აზერბაიჯანსა და სომხეთში. სულ უფრო მტკიცდება ტრადიციულად მჭიდრო კეთილმეზობლური კავშირები ჩვენს მეზობელ ქვეყნებთან – თურქეთთან, აზერბაიჯანთან, სომხეთთან.

პრემიერმა დემოკრატიული რესპუბლიკის დაარსებიდან 100 წლისთავზეც ისაუბრა.

“წელს ჩვენმა ქვეყანამ მასშტაბურად აღნიშნა პირველი დემოკრატიული რესპუბლიკის დაარსებიდან 100 წლისთავი როგორც საქართველოში, ისე მის ფარგლებს გარეთ. ქართული დიპლომატიის წარმატებული მუშაობის დასტურია ამ თარიღთან დაკავშირებულ ღონისძიებებში მრავალი ქვეყნის უმაღლესი დონის დელეგაციების სტუმრობა თბილისში და ასევე ჩვენი საელჩოების მიერ ორგანიზებულ ღონისძიებებში ბევრი ცნობილი ადამიანის მონაწილეობა”.

აღნიშნა ფრანკფურტის წიგნის საერთაშორისო ბაზრობაზე საქართველოს წარმომადგენლობის მნიშვნელლობა.

“მინდა განსაკუთრებული სიამაყით აღვნიშნო, რომ წელს პირველად ფრანკფურტის წიგნის საერთაშორისო ბაზრობაზე საქართველოს საპატიო სტუმარი ქვეყნის სტატუსით მონაწილეობამ მნიშვნელოვნად გაზარდა საქართველოს, როგორც უნიკალური კულტურისა და ლიტერატურის ქვეყნისადმი, დაინტერესება, ასევე მისი საერთაშორისო ცნობადობა და საქართველოს პოპულარობა”.

საზღვარგარეთ საქართველოს დიპლომატიური წარმომადგენლობების ხელმძღვანელებთან სამუშაო შეხვედრებს საქართველოს პრეზიდენტი, პრემიერ-მინისტრი და პარლამენტის თავმჯდომარე გამართავენ.