{{ARTICLEIMAGE}}
იუსტიციის უმაღლესი საბჭოს არამოსამართლე წევრი ნაზი ჯანეზაშვილი დღეს სხდომაზე ბავშვთან ერთად მივიდა. სხდომაზე შვილის მიყვანა ჯანეზაშვილის მხრიდან ერთგვარი პროტესტია.
“დღეს იუსტიციის საბჭოში ბავშვთან ერთად მოვედი, ჩემი შვილი არის ორი თვის და როცა ის გაიზრდება, სამწუხაროდ, სასამართლო სისტემა ისევ ჩინჩალაძის კლანის ხელში იქნება. ჩვენ ვიცით, რომ გვირიტიშვილები, ნადარაიები არიან დანიშნული 65 წლის ასაკამდე. ეს ნიშნავს იმას, რომ როდესაც ჩემი შვილი გაიზრდება და გახდება 25 წლის, ისევ ამ კლანის ხელში იქნება სასამართლო სისტემა.
რომ წარმოიდგინოთ 90 იან წლებში რამდენად კორუმპირებული იყო სასამართლო სისტემა და დღეს რომ იგივე ხალხი მართავდეს, ნათლად შეგიძლიათ წარმოიდგინოთ, რა მოხდება 25 წლის შემდეგ. ამიტომ მოვედი დღეს ჩემს შვილთან ერთად. დღეს დღის წესრიგში არის საკითხი, რომელიც უზენაესი სასამართლოს წევრების არჩევას ეხება. უზენაესი სასამართლო ჩვენი მოქალაქეების უკანასკნელი იმედია. მივიღებთ იმას, რომ ისიც ჩინჩალაძის კლანის ხელში აღმოჩნდება”, ამბობს ნაზი ჯანეზაშვილი.
იუსტიციის უმაღლესი საბჭოს სხდომაზე დღეს უზენაესი სასამართლოს მოსამართლეობის კანდიდატებს ასახელებენ.
იუსტიციის უმაღლესი საბჭოს სხდომაზე დღეს უზენაესი სასამართლოს მოსამართლეობის კანდიდატებს ასახელებენ. კონსტიტუციის ახალი რედაქციის მიხედვით, იუსტიციის უმაღლესი საბჭო უფლებამოსილია, პარლამენტში წარადგინოს უზენაესი სასამართლოს მოსამართლის თანამდებობაზე დასანიშნი კანდიდატურები. ასევე კონსტიტუციის მიხედვით, იუსტიციის უმაღლესი საბჭოს უფლებამოსილებებში გადადის ფუნქცია, რომელიც უზენასი სასამართლოს თავმჯდომარის კანდიდატურის შერჩევას გულისხმობს,რომელსაც ასევე პარლამენტს წარუდგენს.