“ვხედავ თუ არა ცვლილებების საჭიროებას? რა თქმა უნდა, კარგი იქნება, ოღონდ დიდი ხანია, მარტო დღეს არა, დიდი ხანია, ამ ცვლილებების ცოტათი მეშინია” – ამის შესახებ, განცხადება ახალქალაქის, კუმურდოსა და კარის მიტროპოლიტმა, მეუფე ნიკოლოზმა TV პირველთან გააკეთა, რითიც გამოეხმაურა, მეუფე იობის ქადაგებას.
“თუ გადავხედავთ საქართველოს ისტორიას, ამაზე უკეთეს მდგომარეობაშიც ყოფილა ჩვენი ქვეყანა და ამაზე უარეს მდგომარეობაშიც. ასე რომ, ამ თვალსაზრისით, რაღაც განსაკუთრებული და ახალი თითქოს არაფერია, ამიტომ მე ვფიქრობ, რომ შეფასებისას, მაინც ჯობია სიმშვიდის შენარჩუნება და მაქსიმალურად საღი აზრით განსჯა.
ვხედავ თუ არა ცვლილებების საჭიროებას? რა თქმა უნდა, კარგი იქნება, ოღონდ დიდი ხანია, მარტო დღეს არა, დიდი ხანია, ამ ცვლილებების ცოტათი მეშინია, რომ ეს ცვლილებები უარესი არ იყოს. ანუ თუ ცვლილებებია, პოზიტიური ცვლილებები უნდა იყოს და ამ მხრივ, რა თქმა უნდა, ყოველთვის ეს მნიშვნელოვანია.
ჩვენ არ ვართ პოლიტიკოსები, არ უნდა ვიყოთ პოლიტიკოსები, იმიტომ, რომ პოლიტიკოსობა პროფესიაა და სპეციალური განათლებაა ამისთვის საჭირო. მე ეს განათლება არასდროს მიმიღია და აი, რაშიც მაქვს განათლება მიღებული, იმ სფეროში, ეს არის ღვთისმეტყველება, იმ სფეროში მე ვცდილობ მაქსიმალურად გამოვავლინო და გავუზიარო ჩვენს თანამემამულეებს, ეკლესიის წევრებს ეს ჩემი გამოცდილება” – თქვა მეუფე ნიკოლოზმა TV პირველთან.