უკრაინის პრეზიდენტი სოციალურ ქსელში რუსეთის ნავთობგადამამუშავებელ ქარხნებზე უკრაინის მორიგ შეტევებს ეხმაურება და წერს:
“ჩვენმა მეომრებმა უკრაინის კონსტიტუციის დღე დიდი სიზუსტით დაიწყეს. გასულ ღამეს ჩვენმა შორ მანძილზე მოქმედმა სანქციებმა რუსეთის ორ ნავთობგადამამუშავებელ ქარხანას მიაღწია.
დარტყმა განხორციელდა კრასნოდარის მხარეში მდებარე სლავიანსკის ნავთობგადამამუშავებელ ქარხანაზე — ფრონტის ხაზიდან დაახლოებით 300 კილომეტრში. ასევე მივწვდით იაროსლავლის ოლქში მდებარე ნავთობგადამამუშავებელ ქარხანასაც, რომელიც ჩვენი საზღვრიდან დაახლოებით 700 კილომეტრშია.
ჩვენ ვაგრძელებთ ოპერაციებს, რომლებიც რუსეთის ომის წარმოების უნარს ასუსტებს. ყოველი ჩვენი შორ მანძილზე მოქმედი სანქცია ნიშნავს ნაკლებ რესურსს რუსეთის სამხედრო მანქანისთვის და კიდევ ერთ ნაბიჯს მშვიდობისკენ.
ჩვენ გავაგრძელებთ პასუხს რუსულ ტერორზე. მადლობას ვუხდი ჩვენს მეომრებს ამ შედეგებისთვის. მადლობელი ვარ ყველას, ვინც გვეხმარება. ყველა, ვინც უკრაინას იცავს, კონსტიტუციის ძალასაც იცავს.“
Our warriors began Ukraine’s Constitution Day with great accuracy. Last night, our long-range sanctions reached two oil refineries in Russia. The Slavyansk oil refinery in the Krasnodar region was hit – about 300 kilometers from the frontline. We also reached a refinery in the… pic.twitter.com/MiKOSjszFF
— Volodymyr Zelenskyy / Володимир Зеленський (@ZelenskyyUa) June 28, 2026
კრასნოდარის მხარის გუბერნატორმა ვენიამინ კონდრატიევმა დაადასტურა დრონებით თავდასხმა სლავიანსკ-ნა-კუბანის ნავთობგადამამუშავებელ ქარხანაზე. მისი ცნობით, ქარხნის ტერიტორიაზე ხანძარი გაჩნდა, დაზიანდა ელექტროგადამცემი ხაზი და გაზსადენი.
გუბერნატორის ინფორმაციით, თავდასხმის შედეგად დაიღუპა ერთი ადამიანი. დრონების ნამსხვრევების ჩამოვარდნის შედეგად დაზიანდა რამდენიმე კერძო სახლიც. კიდევ ერთი ადამიანი დაშავდა, რომელსაც დახმარება ადგილზე აღმოუჩინეს.
OSINT-ანალიზზე დაყრდნობით, Telegram-არხები Astra და Ateo Breaking წერენ, რომ თავდასხმის სამიზნე სლავიანსკის ნავთობგადამამუშავებელი ქარხანა გახდა.
„სლავიანსკ-ეკო“, იგივე სლავიანსკის ნავთობგადამამუშავებელი ქარხანა, რუსეთის ერთ-ერთი მსხვილი დამოუკიდებელი ნავთობგადამამუშავებელი საწარმოა. მისი წლიური სიმძლავრე დაახლოებით 4-5 მილიონი ტონა ნედლეულია. ქარხანა სამხრეთის ფედერალურ ოლქში ნავთობის გადამუშავების დაახლოებით 9%-ს უზრუნველყოფს და შავი ზღვის პორტების გავლით ნავთობპროდუქტების მსხვილ ექსპორტიორებს შორისაა.
სლავიანსკის ნავთობგადამამუშავებელი ქარხანა უკრაინული თავდასხმების სამიზნე ადრეც გამხდარა.
ბოლო პერიოდში უკრაინა აქტიურად უტევს რუსეთის სამხედრო და ენერგეტიკულ ობიექტებს, მათ შორის უკრაინის საზღვრიდან მოშორებულ რეგიონებშიც. 25 ივნისს უკრაინის პრეზიდენტმა ვოლოდიმირ ზელენსკიმ განაცხადა, რომ დაამტკიცა უსაფრთხოების სამსახურის 40-დღიანი ოპერაცია, რომლის მიზანიც „აგრესორ სახელმწიფოზე ზეწოლა და ომის შეწყვეტისკენ იძულებაა“.
რუსეთის თავდაცვის სამინისტრომ 28 ივნისის დილით განაცხადა, რომ ღამის განმავლობაში რუსეთის სხვადასხვა რეგიონში, ანექსირებულ ყირიმში, ასევე აზოვისა და შავი ზღვების აკვატორიებზე, 213 უკრაინული დრონი ჩამოაგდეს.
