უკრაინის პრეზიდენტმა ვოლოდიმირ ზელენსკიმ პრემიერ-მინისტრ იულია სვირიდენკოს მოსალოდნელი გადადგომის შესახებ განაცხადა. შესაბამისი გეგმების თაობაზე ზელენსკიმ კვირას, 12 ივლისს, Telegram-ზე დაწერა.
სახელმწიფოს მეთაურის განცხადებით, უკრაინა პოლიტიკურ სტრატეგიას ცვლის.
„დეტალები უკრაინის პრემიერ-მინისტრ იულია სვირიდენკოსთან განვიხილეთ. დავადგინეთ, რომ ცვლილებებისთვის მინისტრთა კაბინეტის განახლებაა საჭირო“, — აღნიშნა ვოლოდიმირ ზელენსკიმ.
მოსალოდნელია ცვლილებები მთავრობასა და სამართალდამცავი უწყებების ხელმძღვანელობაში
ზელენსკიმ სვირიდენკოს მადლობა გადაუხადა პრემიერ-მინისტრის თანამდებობაზე მკაფიო, სტაბილური და ეფექტიანი მუშაობისთვის, ასევე უკრაინის გუნდში მრავალწლიანი შედეგიანი საქმიანობისთვის. პრეზიდენტმა მას შესთავაზა, უხელმძღვანელოს „ახალ, მნიშვნელოვან მიმართულებას საკვანძო პარტნიორთან ურთიერთობებში“. დეტალები მას არ დაუკონკრეტებია.
„იმედი მაქვს, რომ პარლამენტარებთან ერთად უკრაინის მთავრობაში შესაბამის ცვლილებებს განვახორციელებთ. ცვლილებები იქნება სამართალდამცავი უწყებების ხელმძღვანელთა შემადგენლობაშიც“, — განაცხადა მან.
აშშ-სთან ურთიერთობები და Patriot-ის რაკეტების წარმოების ლიცენზიები
მოსალოდნელ საკადრო ცვლილებებზე საუბრისას ზელენსკიმ აღნიშნა, რომ საგარეო პოლიტიკის თითოეულ პრიორიტეტულ მიმართულებაზე პასუხისმგებელი იქნება დიდი გამოცდილების მქონე კონკრეტული პირი, რომელსაც შეეძლება რეალურად განახორციელოს ის, „რაზეც ლიდერების დონეზე ვთანხმდებით და რასაც უკრაინელი ხალხი ელოდება“.
მისი თქმით, ასეთ მიმართულებებს შორის უმნიშვნელოვანესია ურთიერთობები შეერთებულ შტატებთან, მათ შორის შეთანხმებები Patriot-ის საზენიტო-სარაკეტო სისტემებისთვის რაკეტების წარმოების ლიცენზიებზე, ასევე უსაფრთხოების სფეროში სხვა ორმხრივი თანამშრომლობა.
უკრაინის ლიდერის განმარტებით, ამ თანამშრომლობამ „უკრაინისა და ამერიკის სახელმწიფოებისა და კომპანიების კონკრეტულ მიღწევებში უნდა ჰპოვოს ასახვა“.
„ანტიბალისტიკური კოალიცია“ ევროპაში
ზელენსკის განცხადებით, სხვა პრიორიტეტებს შორისაა ევროპული „ანტიბალისტიკური პროექტი“, რომელიც „ამ ათწლეულში ევროპის გაძლიერების ერთ-ერთ უდიდეს ნაბიჯად შეიძლება იქცეს“.
მან ასევე დაასახელა უკრაინის ევროკავშირში გაწევრიანებისკენ მკაფიო წინსვლა და ეკონომიკური, პოლიტიკური და კულტურული კავშირების გაღრმავება.
პოლონეთსა და უნგრეთთან ურთიერთობების ნორმალიზება
ცალკე მიმართულებად ზელენსკიმ უკრაინის მეზობელ სახელმწიფოებთან თანამშრომლობა დაასახელა, რომლებთან ურთიერთობებიც, მისი თქმით, ახალ საფუძველს საჭიროებს.
პრეზიდენტმა განსაკუთრებით გამოყო პოლონეთი და უნგრეთი.
თანამშრომლობა ახლო აღმოსავლეთის ქვეყნებთან
კიდევ ერთი მიმართულებაა ახლო აღმოსავლეთისა და სპარსეთის ყურის რეგიონი, რომელიც ზელენსკის შეფასებით, უსაფრთხოებისა და ეკონომიკის სფეროებში გლობალური თანამშრომლობის ერთ-ერთ ყველაზე პერსპექტიულ მიმართულებას წარმოადგენს.
დარჩენილ პრიორიტეტებს შორის პრეზიდენტმა დაასახელა ჩინეთი და საკვანძო საერთაშორისო ორგანიზაციები, რომლებიც გლობალურ გადაწყვეტილებებზე გავლენას ახდენენ და რუსეთის მიერ უკრაინის წინააღმდეგ წარმოებული ომის დასრულებას უფრო მეტად შეიძლება შეუწყონ ხელი.
შიდა ამოცანები
ზელენსკის თქმით, ახალი გამოწვევები და ამოცანები არსებობს ქვეყნის შიდა პოლიტიკაშიც.
„მნიშვნელოვან გაძლიერებას საჭიროებს მთელი სამუშაო უკრაინის ფრონტისპირა და სასაზღვრო რეგიონებში, რომლებიც ყოველდღიურად რუსეთის დარტყმების სამიზნე ხდება. იმედი მაქვს, გაიზრდება ჩვენი არმიისთვის საჭირო იარაღისა და ყველა ტიპის დრონის მიწოდება“, — დაწერა მან.
ვოლოდიმირ ზელენსკის განცხადებით, კიდევ ერთი უაღრესად მნიშვნელოვანი მიმართულებაა ზამთრისთვის მზადება.
მისი აზრით, უნდა დაჩქარდეს იმ სახელმწიფო კომპანიების ტრანსფორმაცია, რომლებზეც მნიშვნელოვანწილადაა დამოკიდებული უკრაინის მდგრადობა. განსაკუთრებულ ყურადღებას საჭიროებს კიევის შეთანხმებები პარტნიორებთან ქვეყნის აღდგენის სფეროშიც.
უკრაინის პრეზიდენტმა შეაჯამა, რომ საკადრო ცვლილებებმა განახლებული პოლიტიკური სტრატეგიის განხორციელება უნდა უზრუნველყოს.