თელავში სტიქიის შედეგად მიყენებულ ზარალს ითვლიან, რომელიც ადგილობრივი მოსახლეობის და ოფიციალური პირების თქმით საკმაოდ მასშტაბურია.
უხვი ნალექის შედეგად ადიდებულმა თელავის ხევმა კალაპოტი გაარღვია და ქუჩების ნაწილი დატბორა – მათ შორის კორპუსების პირველი სართულები, კომერციული ფართები – მაღაზიები და აფთიაქები. დაზიანდა ავტომობილები, ასევე ელექტროგადამცემი ხაზები.
უამინდობამ თელვის გარდა თელავის მუნიციპალიტეტის რამდენიმე სოფელიც დააზარალა. მოსახლეობა ამბობს, რომ წყალმა სრულად გაანადგურა ჰექტრობით ვენახი. ხევები ადიდდა სოფლებში: წინანდალი, კისისხევი და კურდღელაური. ადგილობრივების თქმით ზიანი მასშტაბურია.
კახეთის სახელმწიფო რწმუნებული, პლატონ კალმახელიძე აცხადებს, რომ დაზიანებულია საგზაო ინფრასტრუქტურა, რომლის პირველადი გაწმენდის სამუშაოები უკვე დაიწყო.
მისი თქმით, მოსახლეობის უსაფრთხოებიდან გამომდინარე, მუნიციპალიტეტს შეზღუდვით მიეწოდება ბუნებრივი აირი და ელექტროენერგია, რომელიც დღის განმავლობაში, პერიოდულად, აღდგება.
„სტიქიით მიყენებული ზიანი საკმაოდ მასშტაბურია. რაც მთავარია, მოსახლეობას საფრთხე არ ემუქრება. მოსახლეობის უსაფრთხოებიდან გამომდინარე, მუნიციპალიტეტს შეზღუდვით მიეწოდება ბუნებრივი აირი და ელექტროენერგია, რომელიც დღის განმავლობაში, პერიოდულად, აღდგება. ძირითადად, დაზიანებულია საგზაო ინფრასტრუქტურა, რომლის პირველადი გაწმენდითი სამუშაოები დაიწყო. ადგილზე შეფასდება სტიქიის მიერ მიყენებული ზიანი სრულად და დაიწყება აბსოლუტურად აღდგენითი სამუშაოები. რაც შეეხება კოორდინაციას, შეკრებილი იყო საკოორდინაციო საბჭო – ყველა სამინისტრო და უწყებაა მობილიზებული იმისთვის, რომ თელავის მუნიციპალიტეტში რაც შეიძლება მალე აღმოიფხვრას სტიქიით გამოწვეული ზიანი“, – განაცხადა პლატონ კალმახელიძემ.
თელავში სტიქიის სალიკვიდაციო ოპერატიული შტაბი შეიქმნა. შტაბის წევრები არიან როგორც საკანონმდებლო, ასევე ადგილობრივი ხელისუფლების წარმომადგენლები.
შტაბის წევრებმა პირველი შეხვედრა უკვე გამართეს და თქვეს, რომ სამომავლო პრევენციულ გეგმაზე შეჯერდნენ.
მათივე განცხადებით, სტიქია საკმაოდ მასშტაბურია და ძირითადად განადგურებულია ქალაქის ინფრასტრუქტურა. ასევე, მოქალაქეთა უსაფრთხოებიდან გამომდინარე, შესასწავლია გარკვეული ქუჩების მდგომარეობა, რის გამოც ამ უბნებზე მოძრაობა აკრძალულია.
თელავში ამ ეტაპზე აღარ წვიმს და წყლის დონემ იკლო.