აშშ-ის პრეზიდენტმა დონალდ ტრამპმა ერისადმი 25-წუთიან მიმართვაში ქვეყნის საარჩევნო სისტემაში არსებულ „შოკისმომგვრელ მოწყვლადობებზე“ ისაუბრა და განაცხადა, რომ საიდუმლო გრიფი მოეხსნა სადაზვერვო მონაცემებს, რომლებიც, სხვა საკითხებთან ერთად, მიუთითებს, რომ ჩინეთმა 220 მილიონი ამერიკელი ამომრჩევლის მონაცემებზე წვდომა მოიპოვა. ტრამპის პირდაპირ ეთერში მიმართვა პარასკევის, 17 ივლისის ღამეს გაიმართა.
„რამდენიმე წლის განმავლობაში, 2020 წლის საარჩევნო კამპანიიდან მოყოლებული, ჩინეთის სახალხო რესპუბლიკა ახორციელებდა ოპერაციას, რომელიც, როგორც მიიჩნევა, არჩევნებთან დაკავშირებული მონაცემების ისტორიაში ყველაზე მასშტაბური გაჟონვა იყო“, — თქვა ტრამპმა. მისი თქმით, ჩინეთის ხელისუფლების ხელში აღმოჩნდა ამერიკელი ამომრჩევლების სახელები, მისამართები, ტელეფონის ნომრები, პარტიული კუთვნილება და სხვა ინფორმაცია. ტრამპის განცხადებით, ეს მონაცემები „იყიდეს, მოიპარეს ან ჰაკერული გზით მოიპოვეს“.
საარჩევნო სისტემის ხარვეზებზე საუბრისას ტრამპმა ასევე განაცხადა, რომ ოთხ შტატში ამომრჩევლად დაახლოებით 278 ათასი ადამიანი იყო რეგისტრირებული, რომლებსაც აშშ-ის მოქალაქეობა არ ჰქონდათ.
ტრამპი: ჩინეთი ხმებს ცვლიდა და ამერიკელ ჟურნალისტებს ჩემ წინააღმდეგ ნეგატიური სტატიებისთვის ფულს უხდიდა
ტრამპმა ცალკე აღნიშნა, რომ ჩინეთმა, სავარაუდოდ, მოპოვებული ამერიკელი ამომრჩევლების მონაცემები 2020 წლის საპრეზიდენტო არჩევნებზე გავლენის მოსახდენადაც გამოიყენა — არჩევნებზე, რომელშიც მან დემოკრატ ჯო ბაიდენთან წააგო. აშშ-ის პრეზიდენტის თქმით, ჩინეთი მის დამარცხებას ცდილობდა, მათ შორის რეალური ხმების ჩანაცვლებითა და იმ ჟურნალისტების მოსყიდვით, რომლებიც მასზე ნეგატიურად წერდნენ. ტრამპის განცხადებით, ჩინეთი მის წინააღმდეგ კიდევ უფრო მეტი უარყოფითი პუბლიკაციისთვის „უზარმაზარ თანხებს იხდიდა“.
ტრამპი ამტკიცებს, რომ ჩინეთი მის დამარცხებას, სხვა მიზეზებთან ერთად, იმიტომ ცდილობდა, რომ ის ქვეყნის წინააღმდეგ მრავალმილიარდიანი ტარიფების დაწესებასა და „მსოფლიოში ყველაზე ძლიერი არმიის“ შექმნას აპირებდა. ამასთან, ტრამპმა აღნიშნა, რომ აშშ-ის საარჩევნო სისტემის მოწყვლადობების გამოყენება მხოლოდ ჩინეთს კი არა, ქვეყნის სხვა „მოწინააღმდეგეებსაც“ შეუძლიათ, მათ შორის რუსეთს, ირანს, ჩრდილოეთ კორეასა და გარკვეულ „არასახელმწიფოებრივ ჯგუფებს“.