აშშ-ის სენატმა პარასკევს, 7 აგვისტოს, 86 ხმით 11-ის წინააღმდეგ დაამტკიცა რუსეთის ენერგორესურსების გაყიდვიდან მიღებული შემოსავლების წინააღმდეგ მიმართული სანქციების ფართომასშტაბიანი პაკეტი, რომელიც რუსი მაღალჩინოსნების, ბანკების და ენერგეტკული სექტორის წინააღმდეგ სანქციებს ითვალისწინებს. ახლა კანონპროექტი წარმომადგენელთა პალატას გადაეცემა, თუმცა მასზე კენჭისყრა საზაფხულო საპარლამენტო არდადეგების გამო სექტემბრის დასაწყისამდე არ გაიმართება.
პაკეტი ითვალისწინებს სანქციების დაწესებას რუსეთის პრეზიდენტ ვლადიმირ პუტინის, რუსი მაღალჩინოსნების, ოლიგარქების, ფინანსური ინსტიტუტების, და ე.წ. „ჩრდილოვანი ფლოტის“ წინააღმდეგ, რომელსაც ნავთობის ექსპორტზე დაწესებული შეზღუდვების გვერდის ასავლელად იყენებენ.
კანონპროექტი ასევე აშშ-ის პრეზიდენტ დონალდ ტრამპს უფლებას მისცემს, რუსული ნავთობისა და გაზის მსხვილი შემსყიდველი ქვეყნებიდან იმპორტირებულ საქონელზე 100 პროცენტამდე ტარიფები დააწესოს.
დოკუმენტი გამონაკლისებს ითვალისწინებს იმ ქვეყნებისთვის, რომლებიც რუსეთიდან მათ მიერ მოხმარებული ბუნებრივი გაზის 15 პროცენტზე ნაკლებს იღებენ და ამ იმპორტის შესამცირებლად შესაბამის ნაბიჯებს დგამენ.
კანონპროექტს სენატორ ლინდსი გრემის სახელი ეწოდა
კანონპროექტს გარდაცვლილი სენატორის, ლინდსი გრემის სახელი ეწოდა. გრემი 11 ივლისს გარდაიცვალა. ის ამ ინიციატივისთვის მხარდაჭერის მოპოვებას ერთ წელზე მეტი ხნის განმავლობაში ცდილობდა.
28 ივლისს სენატმა 86 ხმით 12-ის წინააღმდეგ მხარი დაუჭირა კანონპროექტის განხილვის გაგრძელებას — ეს პროცედურული კენჭისყრა იყო და არა საბოლოო მიღება. 7 აგვისტოს კი სენატმა კანონპროექტი უკვე საბოლოოდ დაამტკიცა — 86 ხმით 11-ის წინააღმდეგ.
ახლა დოკუმენტი წარმომადგენელთა პალატამ უნდა განიხილოს და დაამტკიცოს. ამის შემდეგ ის პრეზიდენტ დონალდ ტრამპს გადაეგზავნება ხელმოსაწერად.
კანონპროექტის მხარდამჭერები აცხადებენ, რომ რუსეთისთვის ენერგორესურსებიდან მიღებული შემოსავლების შემცირება აუცილებელია იმისთვის, რომ ვლადიმირ პუტინს უკრაინაში ომის დაფინანსების შესაძლებლობა შეეზღუდოს. ომი უკვე მეხუთე წელია გრძელდება.
აშშ-ში რუსეთის საელჩომ კანონპროექტი დაგმო და განაცხადა, რომ ის „დათვურ სამსახურს უწევს აშშ-ის მოქმედ ადმინისტრაციას“.
