ვენაში მიმდინარეობს საერთაშორისო ოპერაცია ორი მამაკაცის მოსაძებნად, რომლებმაც მუზეუმიდან 600-ზე მეტი ბრილიანტით შემკული ყელსაბამი მოიპარეს.
პოლიციის ცნობით, ხუთშაბათს დღისით ორმა ეჭვმიტანილმა ვენის გამოყენებითი ხელოვნების მუზეუმში (MAK) მინის ვიტრინა ჩაამტვრია და ბრილიანტებით შემკული პლატინის ყელსაბამი გაიტაცა. მისი ღირებულება, სავარაუდოდ, 4 მილიონ დოლარს აღემატება.
ყელსაბამი, რომელიც ეგვიპტის ყოფილი სამეფო ოჯახისთვის იყო შექმნილი, საიუველირო კომპანია Van Cleef & Arpels-ის გამოფენის ნაწილი იყო. გამოფენა MAK-ში სექტემბრამდე გაგრძელდება.
ეს ქურდობა ევროპულ მუზეუმებში ბოლო პერიოდში მომხდარი გახმაურებული ძარცვების სერიის კიდევ ერთი შემთხვევაა, როდესაც მუზეუმებიდან ძვირფასი არტეფაქტები გაიტაცეს.
ვენის პოლიციამ გამოაქვეყნა სათვალთვალო კამერების მიერ დაფიქსირებული ორი ეჭვმიტანილის ფოტოები. მათ ნიღბები არ ეკეთათ. პოლიცია ყველას მოუწოდებს, ვისაც ამ საქმესთან დაკავშირებით რაიმე ინფორმაცია აქვს, სამართალდამცველებს მიაწოდოს.
პოლიციის განცხადებაში ნათქვამია, რომ ერთ-ერთ მძარცველს, სავარაუდოდ, ცეცხლსასროლი იარაღი ჰქონდა.
ყელსაბამის გატაცების შემდეგ მძარცველები, პოლიციის ცნობით, „ვენის საქალაქო პარკის მიმართულებით“ გაიქცნენ. პარკი მუზეუმის სამხრეთით მდებარეობს.
MAK-ის გენერალურმა დირექტორმა ლილი ჰოლაინმა განაცხადა: „ძალიან ძვირფასი საიუველირო ნივთის ქურდობამ… ძალიან შეგვძრა“.
მისი თქმით, მუზეუმმა სწორედ ამ გამოფენისთვის Van Cleef & Arpels-თან ერთად უსაფრთხოების სპეციალური გეგმა შეიმუშავა. „უსაფრთხოების საკითხებს ძალიან სერიოზულად მივუდექით და ყველა ზომა საგულდაგულოდ იყო მომზადებული“, — განაცხადა ჰოლაინმა.
მისი თქმით, „შეიარაღებული ინციდენტის“ დროს თანამშრომლები მშვიდად მოქმედებდნენ და დადგენილ პროცედურებს მიჰყვებოდნენ. არავინ დაშავებულა.
ჰოლაინმა ასევე აღნიშნა, რომ გამოფენის გახსნამდე MAK-მა უსაფრთხოების ზომები დეტალურად გადახედა, „განსაკუთრებით ბოლო წლებში დიდ მუზეუმებში მომხდარი ინციდენტების გათვალისწინებით“.
ხუთშაბათს ესპანეთის ერთ-ერთი მუზეუმიდან პრეისტორიული პერიოდის სამკაულებისა და არტეფაქტების ერთ-ერთი უმნიშვნელოვანესი კოლექცია მოიპარეს.
ამ თვის დასაწყისში სიცილიის მუზეუმიდან რენესანსის ეპოქის ოთხი ფერწერული ტილო გაიტაცეს, ხოლო წლის დასაწყისში პარმის მუზეუმიდან რენუარის, სეზანისა და მატისის სამი ნახატი მოიპარეს, რომელთა ღირებულება მილიონობით ევროს შეადგენს.
ამ ძარცვებს წინ უძღოდა პარიზის ლუვრში გასული წლის ოქტომბერში მომხდარი გახმაურებული და თავხედური ქურდობა, როდესაც ნიღბიანმა მძარცველებმა ფასდაუდებელი ძვირფასეულობა გაიტაცეს.
ქურდობების ამ სერიამ ევროპული კულტურული დაწესებულებების უსაფრთხოებასთან დაკავშირებით კითხვები გააჩინა.
ევროპოლის განცხადებით, მუზეუმებში ქურდობები „სულ უფრო აგრესიული ხდება და დამნაშავეები ძალადობრივ და ძალისმიერ მეთოდებზე გადადიან“. უწყების შეფასებით, ეს „შესაძლოა ახალი კრიმინალური ქსელების მონაწილეობაზე მიუთითებდეს“.
ვენაში მოპარული ყელსაბამი ეგვიპტის ყოფილი სამეფო ოჯახისთვის იყო შექმნილი. 1939 წელს ის დედოფალ ნაზლის ეკეთა თავისი ქალიშვილის, ფავზიას ქორწილში, რომელიც ირანის მომავალ შაჰს — მოჰამედ რეზა ფეჰლევის — გაჰყვა ცოლად.
Van Cleef & Arpels ამ სამკაულს „თეთრი საიუველირო ხელოვნების ტრიუმფს“ უწოდებს. ყელსაბამზე დამაგრებული ბრილიანტების საერთო წონა 200 კარატს აღემატება.
ათი წლის წინ, როდესაც ყელსაბამი აუქციონზე გაიტანეს, მისი სავარაუდო ღირებულება 3,6-დან 4,6 მილიონ დოლარამდე იყო შეფასებული.
ვენასა და ქვემო ავსტრიის პროვინციაში მობილიზებულია პოლიციის კინოლოგიური დანაყოფები. ექსპერტები მტკიცებულებებსა და სათვალთვალო კამერების ჩანაწერებს სწავლობენ.
გამოფენა უკვე ხელახლა გაიხსნა.