2026 წლის 4 აპრილს ლაზარე ჯორბენაძის თვითმკვლელობის ფაქტზე, შინაგან საქმეთა სამინისტროში მიმდინარე გამოძიების ფარგლებში, ჩატარებულია არაერთი საგამოძიებო და საპროცესო მოქმედება. ამ ეტაპზე, უტყუარად დადასტურებულია თვითმკვლელობის ფაქტი, – ამის შესახებ ინფორმაციას საქართველოს პროკურატურა ავრცელებს.
ლაზარე ჯორბენაძის გარდაცვალების საქმეზე მიმდინარე გამოძიების ფარგლებში საქართველოს პროკურატურა 11 პირის გამოკითხვას გეგმავს. მათ შორის არიან ნიკა გვარამია, ირმა ინაშვილი, ნანუკა ჟორჟოლიანი, ხატია დეკანოიძე, თაზო დათუნაშვილი, გია ხუხაშვილი, გიორგი ლილუაშვილი, ზაზა დავითაია, ერმილე ნემსაძე და გიორგი გიგაური.
პროკურატურის ინფორმაციით, საქმეზე ასევე გამოიკითხება საქართველოს ყოფილი პრემიერ-მინისტრი ირაკლი ღარიბაშვილი.
გამოკითხულნი არიან ჯორბენაძესთან შემხებლობაში მყოფი პირები, მათ შორის ოჯახის წევრები და მეუღლე.
პროკურატურის განცხადებით, ამ ეტაპზე გამოძიებით დადასტურებულია თვითმკვლელობის ფაქტი. თუმცა, ირაკლი ღარიბაშვილისა და სხვა პირების მიერ საჯაროდ გაკეთებული განცხადებების საფუძველზე, დამატებით გამოკითხვებს პროკურატურის ზედამხედველობით ჩაატარებენ.
„მაღალი საჯარო ინტერესის გათვალისწინებით, აღნიშნული პირების გამოკითხვის შედეგების შესახებ, ლაზარე ჯორბენაძის თვითმკვლელობის ფაქტთან დაკავშირებით, თუ რაიმე ახალი გარემოებები გახდა ცნობილი, საზოგადოებას დამატებით მივაწვდით ინფორმაციას“, — ნათქვამია პროკურატურის განცხადებაში.
საქმეზე დამატებითი კითხვები მას შემდეგ გაჩნდა, რაც ირაკლი ღარიბაშვილმა საპატიმროდან გავრცელებულ წერილში ლაზარე ჯორბენაძის გარდაცვალების „რეალურ მიზეზზე“ ისაუბრა და განაცხადა, რომ საზოგადოებაში რამდენიმე ადამიანის თვითმკვლელობის ფაქტთან დაკავშირებით პასუხგაუცემელი კითხვები რჩება.
პროკურატურის განმარტებით, თუ გამოკითხვების შედეგად საქმეზე ახალი გარემოებები გამოიკვეთება, ამის შესახებ საზოგადოებას დამატებით აცნობებენ.