რუსეთის ფედერალურმა უსაფრთხოების სამსახურმა (ФСБ) ოფიციალურად განაცხადა მოსკოვში დიდი ბრიტანეთის საელჩოს ყოფილი დაცვის თანამშრომლის დაკავების შესახებ.
უწყების მტკიცებით, რუსეთის მოქალაქე უკრაინის უსაფრთხოების სამსახურთან (СБУ) თანამშრომლობდა და ბრიტანეთის ელჩზე, ნიგელ კეისზე, თავდასხმას გეგმავდა. მათი ინფორმაციით, დაკავებული, რომელიც კერძო კომპანიის ხაზით საელჩოსა და ელჩის რეზიდენციას იცავდა, აგროვებდა საიდუმლო ინფორმაციას დიპლომატების გადაადგილების მარშრუტებისა და პირადი მისამართების შესახებ.
რუსული მხარე ამტკიცებს, რომ უკრაინული სპეცსამსახურები ე.წ. „ცრუ დროშის“ ოპერაციას ამზადებდნენ, რომლის მიზანიც ბრიტანელ დიპლომატებზე თავდასხმა და ამაში რუსეთის დადანაშაულება იყო, რათა ლონდონი მოსკოვთან პირდაპირ სამხედრო კონფლიქტში ჩაეთრიოს.
დაკავებულს ბრალი სახელმწიფო ღალატის მუხლით წარედგინა.
ლონდონსა და კიევს ФСБ-ს ბრალდებებზე ვრცელი კომენტარი ჯერჯერობით არ გაუკეთებიათ. როგორც გამოცემა Bloomberg წერს, დიდი ბრიტანეთის საგარეო უწყება აცხადებს, რომ ფაქტს სწავლობს და ინფორმირებულია დაკავების შესახებ.
დასავლური მედია ხაზს უსვამს, რომ რუსული მხარე ხშირად იყენებს „ჯაშუშობისა“ და „ღალატის“ მუხლებს პოლიტიკური ზეწოლისა და პროპაგანდისტული ნარატივების გასამყარებლად.
წამყვანი გამოცემა The Times ფსბ-ის ვერსიასა და ბრალდებას სკეპტიკურად უყურებს და აღნიშნავს, რომ კრემლი ამ ყველაფერს უკრაინის ტერორისტულ სახელმწიფოდ წარმოსაჩენად და შიდა პროპაგანდისთვის აკეთებს, თითქოს დასავლეთი და უკრაინა რუსეთში დივერსიებს გეგმავენ. გამოცემები ასევე დასძენენ, რომ ბრიტანეთის საგარეო უწყება სიტუაციას აკვირდება, თუმცა მოსკოვის მხრიდან გაჟღერებულ ბრალდებებს ლონდონში სერიოზულად არავინ აღიქვამს