აშშ-ის პრეზიდენტ დონალდ ტრამპის მოწონების რეიტინგი რეკორდულად დაბალ ნიშნულამდე დაეცა. ამას Focaldata-სა და Financial Times-ის (FT) მიერ ჩატარებული გამოკითხვის შედეგები აჩვენებს, რომლებიც კვირას, 6 სექტემბერს გამოქვეყნდა.
აშშ-ის კონგრესის შუალედურ არჩევნებამდე ორ თვეზე ნაკლები რჩება, ტრამპის საქმიანობას კი რეგისტრირებული ამომრჩევლების მხოლოდ 33% იწონებს. ეს აგვისტოს მაჩვენებელზე სამი პროცენტული პუნქტით ნაკლებია და ყველაზე დაბალი შედეგია მას შემდეგ, რაც ასეთი გამოკითხვების ჩატარება მაისში დაიწყო.
მხარდაჭერა შემცირდა ტრამპის რესპუბლიკელ მხარდამჭერებს შორისაც. ახლა მის საქმიანობას რესპუბლიკელი ამომრჩევლების 72% იწონებს, რაც FT-ის გამოკითხვებში ასევე ახალი მინიმუმია.
ამომრჩევლები ეკონომიკასა და ტრამპის ტარიფებს აკრიტიკებენ
გამოცემის განმარტებით, ამომრჩევლები უკმაყოფილო არიან ეკონომიკის მდგომარეობითა და ცხოვრების გაძვირებით. რეგისტრირებული ამომრჩევლების თითქმის ორი მესამედი მიიჩნევს, რომ ეკონომიკური პოლიტიკა არასწორი მიმართულებით მიდის. ამასთან, გამოკითხულთა 57%-მა განაცხადა, რომ ტრამპის მმართველობის პერიოდში მათი ფინანსური მდგომარეობა გაუარესდა.
ამავე დროს, დიზელის საწვავის ფასმა, რომელიც ქვეყნის მრეწველობისა და სოფლის მეურნეობისთვის ერთ-ერთი მთავარი საწვავია, აშშ-ში ისტორიულ მაქსიმუმს — ერთ გალონზე 5.85 დოლარს — მიაღწია. ერთი გალონი დაახლოებით 3.78 ლიტრია.
გამოკითხვის მონაწილეები კრიტიკულად აფასებენ თეთრი სახლის სავაჭრო პოლიტიკასაც. ამომრჩევლების 56% არ უჭერს მხარს კანადურ საქონელზე პრეზიდენტის მიერ დაწესებულ 50%-იან საბაჟო ტარიფებს. რესპუბლიკელ რესპონდენტებს შორის ამ პოზიციას დაახლოებით მესამედი იზიარებს.
აშშ-ის კონგრესის შუალედური არჩევნები 3 ნოემბერს გაიმართება. თეთრ სახლში განაცხადეს, რომ პრეზიდენტის ადმინისტრაცია კვლავ აპირებს გააგრძელოს ეკონომიკური პროგრამა, რომელიც გადასახადების შემცირებას, დერეგულაციასა და ენერგორესურსების უხვად უზრუნველყოფას ითვალისწინებს.