„თავისუფალი ხალხის პარტიის“ ლიდერმა იაგო ხვიჩიამ „ფორმულას“ ეთერში ბიძინა ივანიშვილთან შეხვედრის დეტალებზე ისაუბრა. მისი თქმით, შეხვედრა 2025 წლის დეკემბერში, თბილისში, მთაწმინდაზე, ივანიშვილის სახლში გაიმართა.ხვიჩიას განცხადებით, „გირჩი“ პარლამენტში შესვლის შემდეგ ივანიშვილთან შეხვედრას არაერთხელ ითხოვდა.
„რაც ჩვენ პარლამენტში შევედით, ჩვენი დაჟინებული ინიციატივა იყო, გაგვეცნო ბიძინა ივანიშვილი. […] კვირაში ერთხელ თუ არა, თვეში ერთხელ მაინც მივდიოდი, ძირითადად, მამუკა მდინარაძესთან, ხანდახან ირაკლი კობახიძესთან და ვეუბნებოდი, რომ გამაცანით ის კაცი რომელიც ქვეყნის რეალური მმართველია“, – განაცხადა მან.
მისი თქმით, საბოლოოდ შეხვედრის ორგანიზების შესახებ მამუკა მდინარაძე დაუკავშირდა. შეხვედრას თავად იაგო ხვიჩიასთან ერთად „გირჩის“ წევრი სანდრო რაქვიაშვილი, ბიძინა ივანიშვილი, ირაკლი კობახიძე და მამუკა მდინარაძე ესწრებოდნენ.
ხვიჩიას თქმით, საუბარი მშვიდ და ურთიერთპატივისცემაზე დაფუძნებულ გარემოში წარიმართა.
„მე მაინტერესებდა, პირობითად, იყო თუ არა შესაძლებელი ჩვენი გეგმების განხორციელება, როგორ უყურებდა ამას „ქართული ოცნება“. მაგრამ ამ საუბარმა მაინც გაცნობითი ხასიათის შინაარსი შეიძინა“, – აღნიშნა ხვიჩიამ.
მისივე თქმით, შეხვედრის შემდეგ კონკრეტული თანამშრომლობის საკითხები არ გამოკვეთილა, თუმცა ივანიშვილთან საუბრის გაგრძელება სურს.
„ჩვენ კიდევ გვინდა შეხვედრა ბიძინა ივანიშვილთან. მე საერთოდ არ მინდა, რომ იმ კაცს ჩემთან ნალაპარაკევი რამე წინ დახვდეს. მე არ ვამბობ, რომ არ ვისაუბრეთ. ბევრ რამეზე ვისაუბრეთ, მაგრამ ახლა თქვენ წარმოიდგინეთ, რომ ადამიანს შეხვდით, ისაუბრეთ, ამ შეხვედრის შესახებ არ ყოფილა საჯაროდ ინფორმაცია. ძალიან ბუნებრივია ბევრ საქმეზე, როდესაც ადამიანები ჯერ ხვდებიან ერთმანეთს არასაჯაროდ, რომ ზედმეტი ხმაური არ გამოიწვიონ, მათ შორის მიდის ბევრი რამის ლაპარაკი, დამუშავება, ან პირველი ნაბიჯით სვლა შეთანხმებისკენ“, – თქვა მან.
ხვიჩიას განმარტებით, შეხვედრის შესახებ ინფორმაციის გასაჯაროება თავდაპირველად შეთანხმებული არ ყოფილა, თუმცა, როდესაც ჟურნალისტმა სანდრო რაქვიაშვილს შეხვედრის შესახებ ჰკითხა, მან ფაქტი არ დამალა.
„ჩვენ არ ვატყუებთ საზოგადოებას, მიუხედავად იმისა, რომ ჩვენ ვიყავით შეთანხმებული ბიძინა ივანიშვილთან, რომ ჩვენი მხრიდან არ იქნებოდა გასაჯაროებული ამ შეხვედრის შესახებ“, – თქვა ხვიჩიამ.
„თავისუფალი ხალხის პარტიის“ ლიდერმა ივანიშვილთან შეხვედრას მისი ცხოვრების ყველაზე მნიშვნელოვანი მოვლენა უწოდა.
„ჩვენ ძალიან ვამაყობთ ამით. მე ვამბობ ხოლმე, რომ ჩემი ცხოვრების ყველაზე მნიშვნელოვანი შეხვედრა იყო-მეთქი. ასევე ჩემი ცხოვრების მეორე ყველაზე მნიშვნელოვანი შეხვედრა იყო მიხეილ სააკაშვილს რომ შევხვდით ციხეში“, – თქვა იაგო ხვიჩიამ.
ხვიჩიამ ასევე მადლობა გადაუხადა ირაკლი კობახიძესა და მამუკა მდინარაძეს, რომელთა მხარდაჭერითაც, მისი თქმით, შეხვედრა შედგა.