რუსი არტისტის, მაქსიმ გალკინის კონცერტი, რომელიც კვირას, 25 ოქტომბერს, თურქეთში, Istanbul Congress Center-ში უნდა გამართულიყო, ადგილობრივი ხელისუფლების გადაწყვეტილებით გაუქმდა.
„გაუქმების მიზეზი გახდა სტამბოლის გუბერნატორის ადმინისტრაციის ოფიციალური გადაწყვეტილება, რომელიც საზოგადოებრივი წესრიგისა და უსაფრთხოების მოსაზრებებიდან გამომდინარე ღონისძიების ჩატარებას კრძალავს“, — ნათქვამია ღონისძიების ორგანიზატორის მიერ Instagram-ში გამოქვეყნებულ ოფიციალურ განცხადებაში.
ორგანიზატორებმა კონცერტის გაუქმების გამო სინანული გამოთქვეს, მაყურებლებს ბოდიში მოუხადეს და ბილეთების თანხის დაბრუნების პროცედურის შესახებ ინფორმაცია გაავრცელეს.
კონცერტამდე სამი დღით ადრე თურქულმა გაზეთმა Yeni Şafak ყურადღება გაამახვილა იმაზე, რომ თურქეთში ჩასვლას გეგმავდა შოუმენი, რომელიც, გამოცემის შეფასებით, ღაზის სექტორში ისრაელის ქმედებებს ამართლებს.
„პროისრაელელი, ე.წ. კომიკოსი მაქსიმ გალკინი, რომელიც ღაზაში გენოციდს „კანონიერ თავდაცვას“ უწოდებს, სტამბოლში გამოვა“, — ნათქვამია გაზეთის მიერ 22 ოქტომბერს სოციალურ ქსელ X-ში გამოქვეყნებულ პოსტში.
იქვე გამოქვეყნებულია ვიდეომასალაც გალკინის მონაწილეობით, მათ შორის მისი განცხადებები რუსეთის შესახებ, ასევე ზოგადი კადრები ღაზის სექტორიდან.
ადგილობრივი მედიის გარდა, კონცერტის გაუქმებას საზოგადოებრივი მოძრაობა „7 ოქტომბერიც“ მოითხოვდა. მოძრაობამ თურქეთის „კომპეტენტურ ორგანოებს“ გალკინის გამოსვლის გაუქმებისკენ მოუწოდა.
წინააღმდეგ შემთხვევაში, მოძრაობის წევრები და სხვა მოქალაქეები კონცერტის დღეს Istanbul Congress Center-ის წინ საპროტესტო აქციის გასამართად შეკრებას გეგმავდნენ, ნათქვამია ღია მიმართვაში.
გალკინის კონცერტები რუსეთის ომის დაწყების შემდეგ პირველად არ გაუუქმებიათ
მაქსიმ გალკინმა უკრაინაში ომის დაწყების შემდეგ რუსეთის ფედერაცია დატოვა და მეუღლესთან, ალა პუგაჩოვასთან ერთად ისრაელში გადავიდა საცხოვრებლად.
2023 წლის 7 ოქტომბერს ჰამასის თავდასხმის შემდეგ არტისტმა ვიდეო ჩაწერა, რომელშიც ისრაელს მხარდაჭერა გამოუცხადა. ვიდეოში მან თქვა:
„ჩვენ ვამაყობთ იმით, რომ ახლა ამ ერთიან ერთან კავშირი გვაქვს“.
2023 წლის შემოდგომაზე გალკინის გამოსვლები ასტანასა და ალმათიში გაუქმდა. ოფიციალურად ორგანიზატორები და საკონცერტო დარბაზების წარმომადგენლები ტექნიკურ მიზეზებზე მიუთითებდნენ, თუმცა თავად შოუმენი საჯაროდ აცხადებდა, რომ ამ ყველაფრის უკან პოლიტიკურ მოტივებსა და ყაზახეთის ხელისუფლების მხრიდან შექმნილ დაბრკოლებებს ხედავდა.
2024 წლის იანვარში მაქსიმ გალკინის გამოსვლები ინდონეზიაშიც გაუქმდა.
ამის შესახებ მან Instagram-ის საკუთარ გვერდზე დაწერა და აღნიშნა, რომ „გამოსვლისთვის ყველა დოკუმენტი წესრიგში იყო“, ხოლო მიზეზად რუსეთის მთავრობის წერილი დაასახელა, რომელშიც ინდონეზიის ხელისუფლებას სთხოვდნენ, იგი ბალიზე არ შეეშვათ.
„მათთვის [ინდონეზიის ხელისუფლებისთვის — რედ.] გაცილებით კომფორტულია, დააკმაყოფილონ რუსეთის ფედერაციის თხოვნა, ვიდრე გაერკვნენ მათთვის უცნობი რომელიმე ცალკეული არტისტის საკითხებში“, — განმარტა მან.
კონფლიქტი თურქეთსა და ისრაელს შორის
თურქეთი აპირებს, ინტერპოლის მეშვეობით ისრაელის პრემიერ-მინისტრის, ბენიამინ ნეთანიაჰუს საერთაშორისო ძებნაში გამოცხადებას მიაღწიოს, განაცხადა 21 აგვისტოს ქვეყნის იუსტიციის მინისტრმა აქინ გიულექმა.
ანკარის გადაწყვეტილება უკავშირდება ნეთანიაჰუს დაკავების ორდერს, რომელიც მანამდე სტამბოლის უმაღლესმა სისხლის სამართლის სასამართლომ გასცა.
ამის საფუძველი გახდა 2026 წლის მაისში ისრაელის მიერ ღაზის სექტორისთვის ჰუმანიტარული დახმარების მიმტანი Global Sumud-ის ფლოტილიის დაკავება.
მაშინ ისრაელის სამხედროებმა საერთაშორისო წყლებში Global Sumud-ის სულ მცირე ორ გემს გაუხსნეს ცეცხლი და მთლიანობაში 40 ქვეყნიდან 430 აქტივისტი დააკავეს.
ისრაელის პრემიერ-მინისტრის ადმინისტრაციაში თურქეთის ხელისუფლების ბრალდებები უარყვეს და მისი ქმედებები გააკრიტიკეს.
იქ Reuters-ს განუცხადეს, რომ თურქეთის პრეზიდენტ რეჯეფ თაიფ ერდოღანის „საბრალო მცდელობები“, დააშინოს ისრაელის ხელმძღვანელობა და სამხედრო მოსამსახურეები, შედეგს ვერ გამოიღებს.