“შეწყვიტეთ თორნიკე რაზმაძის წინააღმდეგ საქმე!” – ახალგაზრდა იურისტთა ასოციაცია facebook-ზე დაწერილი კომენტარის გამო, აქტივისტ თორნიკე რაზმაძის მიმართ საქმის წარმოების დაწყებას გამოეხმაურა და შსს-ს მოუწოდებს, რომ ამ საქმის წარმოება შეწყვიტოს.
“საია მიიჩნევს, რომ თორნიკე რაზმაძის მიმართ ფეისბუქ-კომენტარის გამო ადმინისტრაციული სამართალდარღვევის საქმის დაწყება ცენზურის პრეცედენტია. შინაგან საქმეთა სამინისტროს მოვუწოდებთ, ამ საქმეზე დაწყებული წარმოება შეწყვიტოს და კრიტიკული გამოხატვის კონტროლისა და დასჯისგან თავი შეიკავოს. შსს-ს მიერ საჯარო სივრცეში შეურაცხყოფის საბაბით კრიტიკულად განწყობილი ადამიანების დასჯა შემაშფოთებელ პრაქტიკად იქცა, რომელიც საზოგადოების დაშინებას, მწვავე პოლიტიკური გამოხატვის დასჯასა და მსუსხავი ეფექტის შექმნას ისახავს მიზნად. სიახლე არ არის, რომ სახელმწიფო სრულიად უგულებელყოფს გამოხატვის თავისუფლების დაცვისთვის დადგენილ სტანდარტებს, მათ შორის, არ ითვალისწინებს გამოხატვის მნიშვნელობას საჯარო დისკუსიაში, არ აფასებს ჩარევის აუცილებლობასა და პროპორციულობას.თორნიკე რაზმაძის მიმართ დაწყებული ადმინისტრაციული წარმოება გამოხატვის თავისუფლების შეზღუდვის კიდევ ერთი მაგალითია. ამასთან, ეს შემთხვევა განსაკუთრებით ცხადად წარმოაჩენს მსგავსი სამართალდარღვევის საქმეების აბსურდულობასა და ცინიკურობას. გარდა იმისა, რომ სახელმწიფო სრულიად უგულებელყოფს კომენტარის კონტექსტს და საჯარო დისკუსიაში მის მნიშვნელობას, ამ შემთხვევაში, მსუსხავი ეფექტის შექმნის სამიზნე, მათ შორის, კრემლის ანტიქართული პროპაგანდისადმი კრიტიკული გამოხატვაც ხდება.[…] გასათვალისწინებელია, რომ ვულგარულ გამოხატვას შესაძლოა მხოლოდ სტილისტური დატვირთვა ჰქონდეს. ეროვნულმა სასამართლოებმა უნდა დაიცვან სათანადო ბალანსი და უნდა განასხვავონ დაცული პოლიტიკური ან საზოგადოებრივი ინტერესის მქონე გამოხატვა გაუმართლებელი პირადი შეურაცხყოფისგან”. – წერს ორგანიზაცია.
შსს აცხადებს, რომ თორნიკე რაზმაძის მიმართ ადმინისტრაციული საქმე facebook-ზე ივანიშვილის პრემიერის, ირაკლი კობახიძის შეურაცხყოფის გამო აღძრეს.თავად რაზმაძე კი ამბობს, რომ შსს მას facebook-ზე კრემლის პროპაგანდისტის, მარგარიტა სიმონიანის გინებას ედავება.
“არ დაიჯერებთ, რის გამო აღმიძრეს საქმე და მიბარებენ სასამართლოში, რომ ან დამაპატიმრონ, ან უზარმაზარი ჯარიმა გამომიწერონ. უწყება დღეს მივიღე. საქართველოს შინაგან საქმეთა სამინისტრო მედავება იმას, რომ რუს პროპაგანდისტებს, მარგარიტა სიმონიანსა და ვლადიმირ სოლოვიოვს რატომ მიაყენე შეურაცხყოფა და რატომ აგინეო.
საქმე ეხება აგვისტოში გამოქვეყნებულ ვიდეოს, რომელშიც ვაჩვენებ, რუსი პროპაგანდისტები, მარგარიტა სიმონიანი და ვლადიმირ სოლოვიოვი თავიანთ ერთ-ერთ ეთერში როგორ ღლიცინებენ და საუბრობენ იმაზე, რომ როგორც ერეკლე II მოვიდა მუხლებზე ფორთხვით და შეგვეხვეწა, ჩვენი მფარველობის ქვეშ მიგვეღოო, ყოველთვის ასე მოვლენ სხვა ქართველებიც მომავალში და მუხლებზე დამდგარი შეგვეხვეწებიან, რომ ისევ მფარველობა გავუწიოთო – ამაზე ჩემი კომენტარი იყო “ნა კალენიახ” თქვენი დედაც-მეთქი. სასამართლო 29 სექტემბერს ჩაინიშნა”. – ამბობს თორნიკე რაზმაძე.