ვენეციის კინოფესტივალის მთავარი პრიზი „უცნობმა ქალმა“ მოიპოვა

ვენეციის 83-ე საერთაშორისო კინოფესტივალის მთავარი პრიზი — „ოქროს ლომი“ — დანიელი რეჟისორის მაი ელ-ტუხის დრამამ „უცნობი ქალი“ (Woman Unknown) მოიპოვა. ფილმმა კიდევ ერთი მნიშვნელოვანი ჯილდოც მიიღო – მთავარი როლის შემსრულებელ მატილდა არსელს საუკეთესო მსახიობი ქალის ჯილდო – „ვოლპის თასი“ გადაეცა. ელ-ტუხი მთავარი კონკურსის 21 ფილმს შორის მხატვრული ფილმის ერთადერთი ქალი რეჟისორი იყო.

„უცნობი ქალის“ მოქმედება მეორე მსოფლიო ომის დასრულების შემდეგ დანიაში ვითარდება. მთავარი გმირი მოსამსახურე ქალია, რომლის წარსულში გერმანელ ჯარისკაცთან ურთიერთობამ შესაძლოა მისი მომავალი გაანადგუროს. ფილმი იმ ქალების ბედსაც ეხება, რომლებსაც ოკუპაციის დროს გერმანელ სამხედროებთან ურთიერთობის გამო ომის შემდეგ საზოგადოებრივი ანგარიშსწორება შეეხოთ. ელ-ტუხის თქმით, მისი ფილმი ქალის სხეულზე, როგორც „ბრძოლის ველზე“, და იმ ქალებზეა, რომელთა ისტორიაც ხშირად უხილავი და გაუგონარი რჩება.

ჟიურის დიდი პრიზი — „ვერცხლის ლომი“ — სამხრეთკორეელი რეჟისორის ლი ჩან-დონის ფილმს „შესაძლო სიყვარული“ (Possible Love) გადაეცა. საუკეთესო რეჟისურისთვის „ვერცხლის ლომი“ კი ილია ხრჟანოვსკიმ მიიღო ფილმისთვის „დაუ“.

ხრჟანოვსკიმ ჯილდო ხარკოვსა და უკრაინელებს მიუძღვნა. რეჟისორმა აღნიშნა, რომ „დაუზე“ 2000-ზე მეტი ადამიანი მუშაობდა და მათ შორის ბევრი უკრაინელი და ხარკოველი იყო. ფილმის მნიშვნელოვანი ნაწილი სწორედ ხარკოვში გადაიღეს. „დაუ“ საბჭოთა ფიზიკოს ლევ ლანდაუსა და საბჭოთა სამეცნიერო ელიტის სამყაროს ეხება. გადაღებებისთვის საბჭოთა სამეცნიერო ინსტიტუტის მასშტაბური გარემო შექმნეს, სადაც მონაწილეები აღდგენილი ეპოქის წესებით ცხოვრობდნენ — პროექტის მეთოდები წლების განმავლობაში მწვავე დისკუსიის საგანი იყო.

საუკეთესო მსახიობი მამაკაცის ჯილდო ჯონ მალკოვიჩმა მიიღო მარტინ მაკდონას ფილმში „Wild Horse Nine“ შესრულებული როლისთვის. მალკოვიჩი ცერემონიას არ დასწრებია და გამარჯვებას კანადიდან ვიდეოჩართვით გამოეხმაურა, სადაც ახალ პროექტზე მუშაობს.

ფესტივალის ერთ-ერთი ყველაზე გახმაურებული ფილმი გახდა ისრაელელი რეჟისორების იუვალ აბრაჰამისა და რახელ შორის დოკუმენტური „NAZA“, რომელმაც ჟიურის სპეციალური პრიზი მიიღო. ღაზას ომზე გადაღებულ ფილმს პრემიერის შემდეგ დაახლოებით 25-წუთიანი ოვაცია მოჰყვა. Reuters-ის ცნობით, დოკუმენტური ფილმი 24 ისრაელელი სამხედრო და დაზვერვის თანამშრომლის ანონიმურ ინტერვიუებს ეყრდნობა და ღაზაში სამხედრო ოპერაციების წარმოების პრაქტიკას მწვავედ აკრიტიკებს. ისრაელი ფილმში გამოთქმულ ბრალდებებს უარყოფს.

საუკეთესო სცენარის ჯილდო სტეფან ბრიზეს, კორალი ამედეოსა და ოლივიე გორსს გადაეცათ ფილმისთვის „A Good Little Soldier“, ხოლო მარჩელო მასტროიანის სახელობის ჯილდო საუკეთესო ახალგაზრდა მსახიობისთვის მალუ კებიზიმ მიიღო ფილმში „A Place to Heal“ შესრულებული როლისთვის.

წელს ფესტივალზე მნიშვნელოვანი ადგილი ეკავა პოლიტიკურ და სოციალურ თემებს — ომს, ღაზას, ქალთა მდგომარეობასა და ძალადობის სხვადასხვა ფორმას. ამავე დროს, დისკუსია გამოიწვია მთავარ კონკურსში ქალი რეჟისორების სიმცირემ. ჟიურის თავმჯდომარემ მეგი ჯილენჰოლმა აღნიშნა, რომ ქალ რეჟისორებს დაფინანსების მოპოვება კვლავ უფრო უჭირთ, ხოლო ფესტივალის დირექტორმა ალბერტო ბარბერამ განაცხადა, რომ ფილმების შერჩევისას მთავარი კრიტერიუმი მხატვრული ხარისხი იყო.

ვენეციის 83-ე კინოფესტივალი 2-12 სექტემბერს გაიმართა. წელს კინოში შეტანილი წვლილისთვის საპატიო „ოქროს ლომები“ ჯორჯ კლუნისა და ელენ ბერსტინს გადაეცათ.