ნაციონალური მოძრაობის წევრი, გია ბარამიძე, დააკავეს. ამ ეტაპზე უცნობია, ბარამიძის დაკავება უკავშირდება თუ არა პროკურატურის მიერ მის წინააღმდეგ “სამშობლოს ღალატისა და საბოტაჟისთვის” დაწყებულ გამოძიებას.
„ახლა მობრძანდნენ ბატონები და მითხრეს, რომ დაკავებული ვარ, საქართველოს ღალატისთვის, არ გრცხვენიათ, მაგას რომ მეუბნებით?“ – აცხადებს გიორგი ბარამიძე.
აგვისტოში პროკურატურამ გაავრცელა ინფორმაცია, რომ გია ბარამიძის განცხადებასთან დაკავშირებით “სამშობლოს ღალატის და საბოტაჟის ფაქტზე” გამოძიება დაიწყეს.
“გამოძიების დაწყებას საფუძვლად დაედო სსიპ ვეტერანების საქმეთა სახელმწიფო სამსახურის განცხადება, იაგო ხვიჩიას საავტორო გადაცემაში “საქართველოს დაბადება” ერთიანი ნაციონალური მოძრაობის წევრის გიორგი ბარამიძის მიერ აფხაზეთის ომისა და ტყვეთა გაცვლის პროცესის შესახებ გაკეთებულ განცხადებასთან დაკავშირებით.გამოძიება საქართველოს სისხლის სამართლის კოდექსის 307-ე პრიმა და 318-ე მუხლით დაიწყო, რაც სამშობლოს ღალატს და საქართველოს სახელმწიფოებრივი ინტერესებისთვის საფრთხის შექმნას გულისხმობს. საგამოძიებო ორგანოში, ჩატარდება ყველა საჭირო საგამოძიებო და საპროცესო მოქმედება, რომელთა შედეგების შესახებ საზოგადოებას დამატებით მიეწოდება ინფორმაცია.” – წერია უწყების გავრცელებულ განცხადებაში.
19:00-ზე პროკურატურაში ბრიფინგი ჩაინიშნა, რომელიც, სავარაუდოდ, ბარამიძის დაკავებას შეეხება.