რუსეთში საწვავის კრიზისის ფონზე აეროპორტებმა თვითმფრინავების საწვავით შევსებაზე შეზღუდვების მასობრივად დაწესება დაიწყეს. 7 სექტემბრის მდგომარეობით, ასეთი ზომები სულ მცირე 26 მსხვილ რუსულ აეროპორტში მოქმედებდა. ამის შესახებ 10 სექტემბერს გამოცემა „ვერსტკა“ აერონავიგაციური ინფორმაციის სისტემის მონაცემებზე დაყრდნობით წერს.
ჟურნალისტების ცნობით, პირველი შეზღუდვები ჯერ კიდევ ივნისში დაწესდა, მეორე ტალღა კი სექტემბერში დაიწყო. სხვადასხვა აეროპორტში მათი მოქმედების ვადა ერთი თვიდან თითქმის შვიდ თვემდე მერყეობს.
თვითმფრინავებს მხოლოდ ერთი რეისისთვის საჭირო საწვავით ავსებენ
მაგალითად, სანქტ-პეტერბურგის პულკოვოს აეროპორტში 2026 წლის 2 სექტემბრიდან 2027 წლის 16 მარტამდე თვითმფრინავების საწვავით შევსება მხოლოდ ფრენის გეგმით გათვალისწინებული მოცულობით არის შესაძლებელი. დამატებითი საწვავის ჩასხმა შეზღუდულია. მსგავსი წესები 8 ივნისიდან 6 დეკემბრამდე მოქმედებს კალინინგრადის ხრაბროვოს აეროპორტშიც. ეს შეზღუდვები როგორც რუსულ, ისე უცხოურ ავიაკომპანიებს ეხება.
ამასთან, 26 აეროპორტიდან 15-ში შეზღუდვები მხოლოდ უცხოურ ავიაკომპანიებზე ვრცელდება. პილოტებისთვის განკუთვნილ შეტყობინებებში (NOTAM) ნათქვამია, რომ უცხოური ავიაკომპანიების თვითმფრინავებს მხოლოდ ერთი ფრენისთვის საჭირო საწვავის მოცულობით ავსებენ.
ასეთი შეზღუდვები, მათ შორის, მოქმედებს ყაზანის, უფის, პერმის, ეკატერინბურგის, ჩელიაბინსკის, ტიუმენის, ირკუტსკის, ვლადივოსტოკის, ხაბაროვსკისა და იაკუტსკის აეროპორტებში. უფაში საწვავით შევსება ასევე შეუზღუდეს არარეგულარული რეისების შემსრულებელ თვითმფრინავებს.
ყველაზე რთული ვითარება რუსეთის სამხრეთშია
„ვერსტკას“ ცნობით, საავიაციო საწვავის მხრივ ყველაზე რთული ვითარება რუსეთის სამხრეთშია, სადაც უკრაინასთან ომის გამო აეროპორტების ნაწილი დახურულია. ექვსი მოქმედი აეროპორტიდან სოჭში, ვოლგოგრადსა და ასტრახანში შეზღუდვები როგორც რუსულ, ისე უცხოურ ავიაკომპანიებზე ვრცელდება. კრასნოდარში, მინერალნიე ვოდისა და ვლადიკავკაზში კი საწვავით შევსება უცხოურ ავიაკომპანიებს აქვთ შეზღუდული.
რუსეთში საწვავის კრიზისი უკრაინული დრონების მიერ ნავთობგადამამუშავებელ ქარხნებზე განხორციელებული დარტყმების ფონზე გამწვავდა. წლის დასაწყისიდან უკრაინის შეიარაღებულმა ძალებმა რუსეთის ნავთობგადამამუშავებელ ქარხნებს სულ მცირე 70-ჯერ დაარტყეს, რის შედეგადაც ქვეყანაში ნავთობის გადამუშავების მოცულობა ბოლო ორი ათწლეულის მინიმუმამდე შემცირდა.
აგვისტოს ბოლოს რუსეთში ბენზინის წარმოება შიდა მოხმარების მხოლოდ დაახლოებით 70%-ს შეადგენდა, დეფიციტი კი დღეში 30 ათას ტონას აღწევდა. მხოლოდ აგვისტოში უკრაინული დარტყმების გამო სულ მცირე შვიდმა რუსულმა ნავთობგადამამუშავებელმა ქარხანამ წარმოება მთლიანად ან ნაწილობრივ შეაჩერა, ხოლო ქვეყნის 17 რეგიონში საწვავის გაყიდვაზე შეზღუდვები დაწესდა.