აშშ-ის პრეზიდენტ დონალდ ტრამპის სპეციალური წარმომადგენლები, სტივ უიტკოფი და ჯარედ კუშნერი, უკრაინაში მიმდინარე ომის დარეგულირების მცდელობების ფარგლებში, მიმდინარე კვირის ბოლოს, 5-6 სექტემბერს, ჯერ მოსკოვს, შემდეგ კი კიევს ეწვევიან. ინფორმაციას ამის შესახებ თავდაპირველად რუსული სახელმწიფო საინფორმაციო სააგენტო TASS საკუთარ წყაროებზე დაყრდნობით ავრცელებდა, რაც მოგვიანებით უკრაინულმა და საერთაშორისო მედიასაშუალებებმაც დაადასტურეს. თუმცა ვაშინგტონს ვიზიტის ოფიციალური განრიგი საჯაროდ ჯერ არ გამოუქვეყნებია.
უკრაინის პრეზიდენტმა ვოლოდიმირ ზელენსკიმ ოფიციალურად დაადასტურა, რომ ამერიკელი დიპლომატების ვიზიტის წინასწარი თარიღები უკვე შეთანხმებულია.
„ახლახან დავასრულე შეხვედრა გუნდთან, რომელიც მუშაობს აშშ-ის პრეზიდენტის წარმომადგენლებთან მოლაპარაკებებზე. ჩვენ მათთან მუდმივი კავშირი გვაქვს — ფაქტობრივად, 24/7-ზე რეჟიმში და ახლა ვემზადებით შეხვედრებისთვის. წინასწარი თარიღები უკვე არსებობს. ველოდებით აშშ-ის პრეზიდენტის წარმომადგენლებს აქ, კიევში. მათ დაადასტურეს, რომ გამართავენ შეხვედრას მოსკოვში, შემდეგ კი კიევში“ — განაცხადა ზელენსკიმ.
ეს უიტკოფისა და კუშნერისთვის უკრაინის დედაქალაქში პირველი ოფიციალური ვიზიტი იქნება, მაშინ როდესაც ისინი მოსკოვს მანამდე რამდენჯერმე ეწვივნენ.
მიუხედავად დაგეგმილი გრაფიკისა, გავლენიანი უკრაინული გამოცემა Kyiv Independent ამერიკულ ადმინისტრაციასთან დაახლოებულ წყაროზე დაყრდნობით წერს, რომ კიევში გამგზავრება შესაძლოა ბოლო მომენტში გადაიდოს ან შეიცვალოს. მიზეზი უსაფრთხოების გარანტიები და რუსული მხარის მცდელობებია, ჩაშალოს ამერიკელი მაღალჩინოსნების ვიზიტი უკრაინაში. „რუსებს არ სურთ, რომ ისინი კიევში ჩავიდნენ და ცდილობენ გეგმები შეაცვლევინონ“, — ციტირებს წყაროს „Reuters“-ი.
რუსეთის პრეზიდენტის პრესსპიკერმა დიმიტრი პესკოვმა კი ჟურნალისტებთან საუბრისას უარი თქვა ვლადიმერ პუტინთან შეხვედრის ზუსტი თარიღის დადასტურებაზე. ჟურნალისტების კითხვაზე, იქნება თუ არა რაიმე შეთანხმება უკრაინულ მხარესთან ამერიკელი წარმომადგენლების ვიზიტის პერიოდში, მაგალითად, სამგზავრო თვითმფრინავებისთვის საფრთხეებთან დაკავშირებით, პესკოვმა თქვა: „ალბათ, ამერიკელები მოსთხოვენ უკრაინელებს ტერორისტული აქტივობის შეწყვეტას“. განმარტებით კითხვაზე, იქნება თუ არა რაიმე შეთანხმება პირდაპირ მოსკოვსა და კიევს შორის ამ საკითხთან დაკავშირებით, პესკოვმა აღნიშნა: „არა, არ იქნება“.