2026 წლის 30 სექტემბერს, მმართველი საბჭოს გადაწყვეტილების საფუძველზე, ფრიდრიხ ნაუმანის ფონდმა (FNF) საქართველოში საქმიანობა შეწყვიტა და თბილისში თავისი ოფისი დახურა. ამის შესახებ ნათქვამია ფრიდრიხ ნაუმანის ფონდის გამგეობის მიერ პოტსდამში გამოცემულ ოფიციალურ პრესრელიზში, რომელიც 2 ოქტომბრით თარიღდება.
კონრად ადენაუერის ფონდის შემდეგ ეს უკვე მეორე გერმანული ფონდია, რომელიც აცხადებს, რომ „საქართველოს ხელისუფლების ქმედებები ქვეყანაში საქმიანობის გაგრძელების შესაძლებლობას აღარ აძლევს.“
„საქართველოს ხელისუფლების ქმედებები FNF-ს ქვეყანაში საქმიანობის გაგრძელების შესაძლებლობას აღარ აძლევს. მიმდინარე წელს ჩვენმა ფონდმა ახალი „უცხოური გრანტების შესახებ კანონის“ საფუძველზე განაცხადი შეიტანა, რათა ქვეყანაში კვლავ დაგვეფინანსებინა პროექტები და გვეთანამშრომლა პარტნიორ ორგანიზაციებთან. ამასთან, საქართველოს ხელისუფლების წარმომადგენლებმა მოითხოვეს, რომ პროგრამის თითოეული მიმართულება საქართველოს მთავრობის პრიორიტეტებს დაქვემდებარებოდა და ყველა ღონისძიების განსახორციელებლად შესაბამისი ნებართვები მიგვეღო.
ეს პირობები, თავისი არსით, ლიბერალური ფონდისთვის აუცილებელ სამოქმედო თავისუფლებას საფუძველს აცლის. მიუხედავად ამისა, ჩვენი განაცხადით ვცადეთ, გამოგვეყენებინა ყველა შესაძლო შესაძლებლობა, რათა საქართველოში საქმიანობა გაგვეგრძელებინა და მხარი დაგვეჭირა იმ ძალებისთვის, რომლებიც ქვეყნის დემოკრატიული მომავლისთვის იბრძვიან. თუმცა ეს განაცხადი 2026 წლის 28 ივლისს უარყოფილ იქნა. შესაბამისად, ჩვენ ვეღარ ვხედავთ შესაძლებლობას, საქართველოში ისეთი საქმიანობა განვახორციელოთ, რომელიც ჩვენს ღირებულებებსა და პრინციპებს შეესაბამება.
ჩვენი ფონდი საქართველოში 2002 წლიდან იყო წარმოდგენილი. ამ პერიოდის განმავლობაში ინტენსიურად ვთანამშრომლობდით მრავალ პარტნიორ ორგანიზაციასა და ლიბერალურად განწყობილ საზოგადო მოღვაწესთან — თავისუფალი საზოგადოების, საქართველოს ევროპული მომავლისა და საზოგადოებებს შორის მჭიდრო დიალოგის ხელშეწყობის მიზნით. საქართველო დიდი ხნის განმავლობაში იმედისა და დემოკრატიული პროგრესის სიმბოლო იყო.
მომავალშიც ჩვენ მხარს დავუჭერთ ყველა ქართველ ქალსა და კაცს, რომლებიც საკუთარ ქვეყანაში თავისუფალი და დემოკრატიული წესრიგის დამყარებისთვის იბრძვიან. ქვეყნის ფარგლებს გარეთ მათ ხმას გავაგონებთ და მხარს დავუჭერთ მათ, რათა იმუშაონ თავიანთი ქვეყნის თავისუფალი და დემოკრატიული მომავლისთვის.
მადლობას ვუხდით ჩვენს თანამშრომლებს, ყველა პარტნიორსა და მეგობარს, რომელთა დახმარების გარეშე ჩვენი საქმიანობა შეუძლებელი იქნებოდა. ბოლო წლებში ბევრ მათგანს სულ უფრო ხშირად უწევდა პირადი რისკების გაწევა, როდესაც ისინი საკუთარ ქვეყანაში დემოკრატიული და თავისუფალი წესრიგისთვის იბრძოდნენ. ამიტომ საქართველოს პოლიტიკური განვითარების პროცესს დიდი შეშფოთებით ვადევნებთ თვალს“- ნათქვამია განცხადებაში.
ფრიდრიხ ნაუმანის ფონდის მთავარი მისია საქართველოში და ზოგადად სამხრეთ კავკასიაში იყო ლიბერალური დემოკრატიის, თავისუფალი საბაზრო ეკონომიკის, ადამიანის უფლებებისა და კანონის უზენაესობის მხარდაჭერა. გერმანული პოლიტიკური ფონდი, რომელიც საქართველოში 2002 წლიდან ფუნქციონირებდა, თავის საქმიანობას რამდენიმე ძირითადი მიმართულებით ახორციელებდა და ესენია დემოკრატიული ტრანსფორმაციის ხელშეწყობა, ევროპული და ევროატლანტიკური ინტეგრაცია, მედიის თავისუფლება და კვლევები, ახალგაზრდების გაძლიერება.
შეგახსენებთ, მანამდე, დღეს, 2 ოქტომბერს თბილისში ოფისის დახურვის შესახებ განცხადება გააკეთა კონრად ადენაუერის ფონდმაც. ეს გერმანული ფონდიც, დახურვის მიზეზად საქართველოს მთავრობის მიერ მათი საქმიანობის შეზღუდვას ასახელებს. განცხადებაში, რომელიც კონრად ადენაუერის ფონდმა გაავრცელა, ხაზგასმულია, რომ ოფისის დახურვა არის „საქართველოს მთავრობის მიერ შექმნილი პოლიტიკური და სამართლებრივი ჩარჩო-პირობების უშუალო შედეგი, რომელთა პირობებშიც KAS ვეღარ ახერხებს თავისი ძირითადი მისიის შესრულებას.“