რუსეთის ხელისუფლებამ, პოსტსაბჭოთა სივრცეში არსებული კრიმინალური ქსელების მეშვეობით, გამოაცხადა 20 მილიონი დოლარის ოდენობის ჯილდო იმ ინფორმაციისთვის, რომელიც დაეხმარება მათ უკრაინის შეიარაღებული ძალების უპილოტო სისტემების ძალების სარდლის, რობერტ „მადიარ“ ბროვდის პოვნაში. ამის შესახებ The Wall Street Journal-ის ჟურნალისტებს ქვედანაყოფის წევრებმა უამბეს.
თავად ბროვდიმ გამოცემას განუცხადა, რომ ბოლო ერთი წლის განმავლობაში ფრონტზე რუსეთის ყველა დანაკარგის დაახლოებით მესამედი უპილოტო ჯარებზე მოდის. მისი თქმით, ომის დაწყებიდან მოყოლებული მისმა ქვედანაყოფებმა დაკარგეს 79 მებრძოლი და თითოეული დაღუპულისთვის დაჭრეს ან მოკლეს 656 რუსი სამხედრო.
მუქარების გამო, ბროვდის და მის დაქვემდებარებაში მყოფ პირებს უსაფრთხოების გაძლიერებული ზომების დაცვა უწევთ. ინტერვიუს მიმდინარეობისას WSJ-ის ჟურნალისტს მოუწია გეოლოკაციის გამორთვა და თავისი სმარტფონის მოთავსება ფარადეის ჩანთაში, რომელიც ბლოკავს მობილურ კავშირს, Wi-Fi-ს, Bluetooth-სა და GPS-ს. საკომანდო ცენტრში ის დაბურულმინებიანი მანქანით მიიყვანეს.
რობერტ ბროვდი — უჟგოროდის მკვიდრია, უნგრული წარმოშობის. ომამდე იგი მარცვლეულის ბიზნესით იყო დაკავებული, ხოლო უკრაინაში რუსეთის შეჭრის შემდეგ ომში მოხალისედ წავიდა. 2022 წლის მაისში ბროვდიმ შექმნა აეროდაზვერვის ქვედანაყოფი „მადიარის ჩიტები“. დროთა განმავლობაში იგი გაიზარდა უპილოტო სისტემების 414-ე ცალკეულ ბრიგადად.
2025 წლის მაისში ბროვდიმ მიიღო უკრაინის გმირის წოდება, ხოლო ერთი თვის შემდეგ სათავეში ჩაუდგა უკრაინის შეიარაღებული ძალების უპილოტო სისტემების ძალებს. რუსეთში „მადიარს“ დაუსწრებლად მიუსაჯეს უვადო პატიმრობა. მას ბრალად სდებენ დანაშაულის 46 ეპიზოდს, მათ შორის „ტერაქტებს, რომლებმაც გამოიწვიეს მშვიდობიანი მოქალაქეების დაღუპვა და მნიშვნელოვანი ქონებრივი ზიანის მიყენება“.